Nga Blendi Gashi
Qeveria “Mustafa”, të mërkurën miratoi propozim-vendimin për emërimin e bordit drejtues të Agjencisë së Ushqimit dhe Veterinarisë.
Në mesin e shtatë anëtarëve të rinj gjendet edhe emri i Shqipe Demës, ish-zyrtares së Ministrisë së Bujqësisë e cila me 20 shtator të vitit 2015 duke i thyer rregullat e komunikacionit, shkaktoi një aksident trafiku te vendi i quajtur “Te Rrethi” në Prishtinë ku bëri për spital 11 persona, në mesin e të cilëve disa u lënduan rëndë.
Ndonëse rastet e ndryshme me vite nuk zgjidhen nga drejtësia kosovare, rasti i Shqipes çuditërisht u zgjidh brenda një muaji duke u bërë hetim, ngritur aktakuzë dhe shpallur aktvendimi i shkallës së parë.
Dema e cila pranoi fajësinë para Gjykatës Themelore në Prishtinë dhe u dënua me 1 vit burgim, me kusht që brenda 2 vjetësh të mos bëjë shkelje tjetër penale, si dhe iu ndalua vozitja në kategorinë “B” në afat prej një viti.
Por ky vendim i gjykatës u quajt i papranueshëm nga familjarët, duke e konsideruar të padrejtë, ku disa prej tyre paralajmëruan ankesë.
Por reagimi i familjarëve ndaj vendimit të gjykatës dhe më pas ankesa e tyre asapak nuk i ka penguar ekzekutivit të avancojë në pozitë Demën.
Majlinda Sinani-Lulaj, familjare e palës së dëmtuar, të cilës nëna dhe babai i saj iu plagoslën në aksident, ka reaguar ashpër pas emërimit të Demës në bordin e AUV-it, duke u habitur me gradimin që ia ka bërë qeveria.
“A po ju kujtohet Shqipe Dema?
Shqipe Dema, në cilësinë e vozitëses, në vjeshtën e 2015-tës, pati lënduar rëndë e lehtë 11 persona, në aksidentin te Rrethi në Prishtinë.
Lëre që pasojat ligjore të veprimit të saj s’i ka parë me sy, por prej sot, Qeveria e paska graduar në anëtare Bordi të Agjencisë së Ushqimit dhe Veterinarisë!
Krejt shenjat po me drejtojnë kah mendimi se aksidenti që ajo ka shkaktuar nuk ka qenë I paqëllimshëm… veç rrënjët nuk di ku do t’i dalin!”, ka shkruar ajo në Facebook.
Ja çfarë deklaroi Sinani-Lulaj më 24 tetor 2015
Për rastin në fjalë portali ynë raportoi më datë 24 tetor të vitit 2015, ku pikërisht familjarja Sinani-Lulaj, në një bisedë për portalin tesheshi. com shprehu haptas pakënaqësinë me vendimin e gjykatës ndaj Shqipe Demës, duke thënë se me vendime të tilla humbet edhe ai pak besim që ka mbetur në drejtësinë kosovare.
“Arsyeja tashmë, së paku për mua, është baraz me zero. Për secilin veprim të mundshëm timin, që sot, e mbaj përgjegjëse ‘Drejtësinë’ e këtij vendi. Nëse deri sot e kam konsideruar gjithë rastin aksident, pas këtij vendimi të gjykatës kam arsye ta konsideroj të qëllimshëm”, deklaroi atë kohë ajo. /tesheshi.com/
