Ministrja spanjolle e Punës dhe presidentja e platformës së majtë, Sumar Yolanda Diaz, në konferencën e sotme në Madrid, nisi fushatën për zgjedhjet parlamentare, të cilat mbahen në fund të vitit dhe shpalli dëshirën e saj për t’u bërë femra e parë kryeministre në historinë e vendit.
“Sot, me përulësi bëj një hap përpara. Sot dua të bëhem gruaja e parë në histori që mban postin e kryeministrit”, tha Diaz para më shumë se 3000 njerëzve, të cilët i përshëndetën fjalët e saj me duartrokitje.
Ajo shtoi se “Spanja është një grua e pandalshme” dhe se nuk ka kthim prapa, raporton Reuters.
Familja komuniste
Diaz, vajza dhe mbesa e komunistëve të shquar spanjollë, nuk shpalli një program të detajuar, por shpalli një “ligj të ri të të drejtave” dhe një “kontratë” demokratike, sociale dhe ekonomike për dekadën e ardhshme.
Në këtë aktivitet morën pjesë aleatët e Diaz nga Partia e saj Komuniste, kryebashkiakët e Barcelonës dhe Valencias, si dhe feministe dhe përfaqësues të organizatave që luftojnë për të drejtat e popullsisë LGBT.
Agjencia britanike vuri në dukje se përfaqësuesit e partisë Podemos, e cila së bashku me lëvizjen Sumar është në pushtet në Spanjë, mungonin.
Për momentin, nuk është e qartë nëse Podemos, e cila u ofron votuesve politikë të ngjashme të krahut të majtë si Sumar, do të mbështesë Yolanda Díaz ose do të kandidojë veçmas në zgjedhjet parlamentare. /tesheshi.com/
