Si rezultat i politikës “të gabuar” të imigracionit të Gjermanisë, ish-sekretari amerikan i Shtetit Henry Kissinger përshkroi imazhe të mbështetësve të Hamasit që festonin në rrugët e qyteteve gjermane dhe bëri thirrje që grupi të ndëshkohej për të parandaluar përsëritjen e veprimeve të tilla si sulmi i fundit në të Izraelit.
“Ishte një gabim i madh të sillesh në vend kaq shumë njerëz me prejardhje kulturore dhe fetare krejtësisht të ndryshme, sepse kështu krijohen grupe (të ndryshme) interesi”, tha zoti Kissinger në një intervistë për shërbimin televiziv Welt.
Politikani veteran, fitues i Çmimit Nobel për Paqe, nuk përjashtoi përshkallëzimin e mëtejshëm të luftës, as një sulm nga Izraeli kundër Iranit, i cili tha se mbështet Hamasin. “Është e paimagjinueshme për izraelitët që bashkësia ndërkombëtare të diskutojë me ata që filluan konfliktin, të cilët vranë kaq shumë njerëz dhe morën kaq shumë pengje. Duhet të ketë një lloj dënimi. Duhet të ketë një kufizim serioz të aftësive (të Hamasit) në mënyrë që ai të mos përsërisë akte të tilla“, shtoi ai, duke theksuar se Hamasi duhet të përjashtohet nga çdo rol politik dhe Izraeli duhet të “rivendos sovranitetin e tij kombëtar” në rajon.
I pyetur se cili duhet të jetë qëndrimi i Bashkimit Evropian, Kissinger tha se duhet “t’ua bëjë të qartë vendeve që po planifikojnë të përfshihen në konflikt se ata do të paguajnë çmimin për të“, pasi lufta do të ndikonte gjithashtu në Evropë. Veçanërisht për Gjermaninë, ai tha se “duhet t’i japë mbështetjen e pakushtëzuar politike Izraelit – nëse është e nevojshme edhe ushtarake”.
“Konflikti në Lindjen e Mesme ka rrezikun e përshkallëzimit dhe sjelljes së vendeve të tjera arabe në luftë,” paralajmëroi ai, duke kujtuar mësimet e nxjerra nga Lufta e Yom Kippur e vitit 1973, në të cilën një koalicion arab i udhëhequr nga Egjipti dhe Siria sulmuan Izraelin.
Qëllimi i vërtetë i Hamasit dhe mbështetësve të tij “mund të jetë vetëm mobilizimi i botës arabe kundër Izraelit dhe prishja e negociatave të paqes”, tha Kissinger.
Është gjithashtu “e mundur” që Izraeli mund të ndërmarrë veprime kundër Iranit nëse beson se Teherani ka një rol në kryerjen e sulmit, shtoi ish-diplomati i lartë.
Më gjerësisht, tha Kissinger, agresioni i vazhdueshëm i Rusisë në Ukrainë i kombinuar me sulmin e Hamasit ndaj Izraelit përfaqëson një “sulm themelor ndaj sistemit global”. /tesheshi.com/
