Inspektoriati Shtetëror Teknik dhe Industrial gjobiti të paktën 50 subjekte që ushtrojnë aktivitet në fushën e restoranteve apo hotelerisë për shkak të vendosjes së depozitave të gazit pa një miratim më parë të projektit teknologjik.
Aksioni është zhvilluar në muajin korrik dhe duket se ka lidhje me shpërthimin e ndodhur në një restorant në Velipojë, ku ishte vendosur një depozitë prej rreth 1 mijë litrash gaz të lëngshëm.
Të dhënat e publikuara nga ky Inspektorat tregojnë se gjobat e vendosura variojnë nga 500 mijë në 1 milionë lekë, shkruan Monitor.
Pothuajse shumica e subjekteve kanë zgjedhur si variant përdorimin e gazit sidomos në kuzhina, çka u rezulton me një kosto më të ulët sesa përdorimi i energjisë elektrike por për të instaluar këtë sistem duhet të merret miratim paraprak.
Bizneset e kaluara në kontroll i përkasin gjithë vijës bregdetare nga Konispoli, Borshi, Himara, Dhërmiu Golemi ndërkohe që përjashtim nuk bëjnë as restorante dhe hotele në Llogara ku numërohen të paktën shtatë subjekte të gjobitura.
Totali i gjobave të vendosura kap vlerën 10.7 milionë lekë dhe është numri më i lartë i gjobave i vendosur përgjatë gjithë muajve të këtij viti. Kjo vjen në kushtet kur maji dhe qershori kishin një numër modest prej 4 dhe 11 gjoba por që ishin të vendosura kryesisht në pika karburantesh.
Kontrolli përgjatë gjithë bregdetit në korrik duket se ka qenë pjesë e masave të Inspektoratit edhe në kuadër të sezonit turistik veror duke kërkuar rritjen e sigurisë dhe zbatimin korrekt të instalimeve të sistemeve të gazit. /tesheshi.com/
