Kisha serbe në territorin e Universitetit të Prishtinës, është rikthyer sërish në qendër të debatit politik në Kosovës. Ka qenë zëvendësministri i Pushtetit Lokal, Bajram Gecaj, ai që ka trazuar sërish ujrat duke thënë se ajo kishë është ndërtuar me urdhër të Millosheviçit, e ku sipas tij, ka gisht dhe babai i zëdhënësit të komunës së Prishtinës, Erzen Vraniqit, si ish-drejtuesi i kryeqytetit kosovar në kohën e ish-Jugosllavisë.
“Kisha e Vraniqit” e ka quajur Gecaj në një postim
Nuk e kam zakon që të merrem me familjarët e kundërshtarëve politik, pa marrë parasysh implikimet që mund të kenë. Por, pasi e pash në Gazetën Express, dokumentin e nënshkruar nga prindi i zëdhënësit të Lëvizjes Anarkiste të Vetëvendosjes (LAV), i cili si pjesë e regjimit të Millosheviqit ka nënshkruar leje për ndërtimin e Kishës në tokën e UP-së, më shkuan në mendje tri gjëra:
Së pari, sulmet e tmerrshme verbale të Lëvizjes Anarkiste të Vetëvendosje ndaj familjarëve të dhjetëra politikanëve në Kosovë, si dhe sulmet me molotovë të Brigadave të Kuqe të tyre, mbi shtëpitë e banimit e makinat e familjarëve, në emër të patriotizmit të rrejshëm, duke akuzuar të gjithë të tjerët për tradhëti! Së dyti, u çudita me faktin se prindërit e një pjesë të madhe të lidershipit të LAV dhe atyre në Komunë, kanë mbajtur pozita të larta udhëheqëse në regjimin e kaluar, dhe shumë prej tyre edhe në regjimin e Millosheviqit. Dhe së fundi, më ra ndërmend edhe një fjali patetike e Glauk Konjufcës në seancën e fundit të Kuvendit, i cili thoshte se “Kishën në Prishtinë e ka nis Millosheviqi, po e vazhdon Vuqiçi”. Kjo nuk është aspak e vërtetë, por, nëse Glauku e ka ndërmend të vazhdojë me qasjen konfrontuese dhe përpjekjen për nxitje të tensioneve, duhet që së paku, qoftë edhe për hir të rimës, tash e tutje të thotë se “Kishën në Prishtinë e ka nis Millosheviqi, po e vazhdon Vuqiçi, me lejen e dhënë nga Vraniqi”.(sic).
Sakaq, ka reaguar përfaqësuesi i Kishës ortodokse serbe në Kosovë, igumeni Sava Janjiq, duke thënë se ajo nuk është kisha e Millosheviçit, duke e pranuar njëherësh se leja për të është dhënë nga Hamdi Vraniqi, ish-kryeshef ekzekutiv i Prishtinës. Kleriku serb ka thënë kisha nuk është fajtore për shtypjen që mund t’u jetë bërë shqiptarëve. /tesheshi.com/
