Kisha Katolike në Francë do të dëmshpërblejë personat që kanë qenë viktima të abuzimit seksual të priftërinjve dhe shuma e parave varion nga 5000 deri në 60000 euro, shkruan Le Parisien.
Komisioni i Pavarur për Njohjen dhe Kompensimin (CRR), i krijuar me kërkesë të Kishës Katolike për të ndërmjetësuar mes viktimave dhe kishave ku janë kryer abuzime, ka zhvilluar një kornizë brenda së cilës ka disa kompensime të përshtatshme monetare për lloje të ndryshme të veprave dhe krimeve.
Për pagesën e kompensimit do të jenë vetë kishat.
Sipas një studimi të botuar në tetor, që nga vitet 1950, Kisha Katolike në Francë ka qenë përgjegjëse për abuzimin seksual të rreth 216,000 fëmijëve dhe adoleshentëve.
Nëse kësaj i shtohen edhe viktimat e abuzimit në institucionet e kontrolluara nga kisha, numri i viktimave të abuzimit seksual rritet në 330,000. Megjithatë, shumë pak viktima iu drejtuan kishës ose autoriteteve.
Në Gjermani, në vitin 2021, Kisha Katolike shpalli pagesën e dëmshpërblimeve për viktimat e abuzimit në shumën deri në 50,000 euro. Kompensimet e realizuara deri më tani kanë qenë mesatarisht rreth 5000 euro. /tesheshi.com/
