Të mërkurën, në një takim të ambasadorëve të vendeve anëtare të BE-së, Hungaria bllokoi sërish paketën e gjashtë të sanksioneve kundër Rusisë, duke kërkuar që të hiqet lideri i Kishës Ortodokse Ruse, Patriarku Kirill, një nga mbështetësit kryesorë të agresionit kundër Ukrainës, nga lista e personave të sanksionuar.
Me këtë kërkesë, Hungaria bllokoi miratimin e paketës së gjashtë të sanksioneve, e cila përfshin një embargo të importit të naftës ruse që dërgohet me anije, pasi u arrit një marrëveshje politike në nivel krerësh shtetesh apo qeverish.
Që marrëveshja të bëhej ligj, ajo duhej të miratohej nga ambasadorët apo ministrat e shteteve anëtare.
Sipas burimeve diplomatike, janë duke u zhvilluar konsultime me Budapestin për heqjen e bllokadës.
Një takim i Coreper (Komiteti i Përfaqësuesve të Përhershëm), i përbërë nga ambasadorët e shteteve anëtare, është planifikuar sërish për të enjten pasdite në Luksemburg.
Sipas propozimit të sanksioneve të BE-së, patriarku konsiderohet si një “aleat” i gjatë i presidentit rus Vladimir Putin dhe është bërë “një nga mbështetësit kryesorë të agresionit ushtarak të Rusisë kundër Ukrainës”.
Hungaria ka qenë më parë pengesë për miratimin e paketës së gjashtë të sanksioneve, sepse kërkoi përjashtimin nga ndalimi i importit të naftës ruse ose një kompensim të madh financiar për pëlqimin e saj. /tesheshi.com/
