Autoritetet kineze ende nuk kanë raportuar për zhdukjen e Meng Hongwei, presidentit të INTERPOL-it, i cili ishte njëherësh dhe asistent i Ministrit të Sigurisë Publike në Kinë.
Mediat në Hong Kong kanë raportuar se Meng është nën hetim në Kinë, ndërsa gruaja e tij e ka raportuar atë të humbur tek autoritetet franceze duke thënë se nuk ka asnjë lajm prej burrit të saj që nga fundi i shtatorit kur ai udhëtoi nga Franca në Kinë.
Është spekuluar se pas uljes, Meng u mor në një drejtim të panjohur.
INTERPOL me seli në Lyon tha shkurtimisht se rasti po trajtuhet nga autoritetet kompetente në Francë dhe Kinë.
Kjo organizatë shtoi se Sekretari i Përgjithshëm Jürgen Stock e jo Meng, është përgjegjës për organizimin e aktiviteteve ditore në INTERPOL.
Tani për tani, është gjithashtu e paqartë nëse Meng, i zgjedhur President i INTERPOL-it në vitin 2016, është subjekt i një hetimi nga autoritetet kineze të anti-korrupsionit. Kjo fushatë kundër korrupsionit u iniciua nga presidenti kinez Xi Jinping në vitin 2012 dhe që atëherë rreth 1.5 milionë zyrtarë janë nën hetim. /tesheshi.com/
