Kina është e interesuar të marrë pjesë në privatizimin e një numri të madh të kompanive shtetërore në Serbi.
Lajmin e ka dhënë vetë ambasadori kinez në Beograd, Li Manchang në një intervistë për Tanjug-un.
Siç e shpjegoi vetë ambasadori, bëhet fjalë për kompani të mëdha si minierat e bakrit dhe uzinat, por edhe komplekset e mëdha agroushqimore.
Nga 120 ndërmarrje shtetërore që qeveria e Beogradit ka nxjerrë në shitje, 60 prej tyre i do t’i blejë qeveria kineze.
“Ne jemi tani duke folur për disa nga më të mëdhatë, të tilla si kompleksi i madh minerar i Borit. Një nga kompanitë tona më të mëdha ka ardhur këtu tri herë, që tregon jo vetëm se ka interes por dhe një dëshirë të fortë”, tha ambasadori kinez.
Kompleksi i Borit është prodhues dhe përpunues i bakrit dhe një nga më të mëdhatë në Europë. Vetëm vitin e kaluar RTB Bor arriti shifrën e të ardhurave prej 200 milionë eurosh.
Ndërkaq, në fokusin kinez është edhe gjigandi agroushqimor PKB i cili është prodhuesi më i madh i prodhimeve të freskëta ushqimore industriale si dhe të përpunuara. I vendosur në rrethinat e Beogradit, PKB ka një nivel të ardhurash në vit prej 40 milionë eurosh.
Ambasadori kinez shtoi se ai po merret personalisht me negociatat për kombinatin ushqimor.
Ministria e Energjisë e Serbisë tha se në qershor do të zhvillohet tenderi për kombinatin e madh agroushqimor dhe sipas gjasave do t’u jepet kinezëve.
Ministri Aleksandar Antiç, gjithashtu vuri në dukje se kompanitë e mëdha kineze, ruse dhe kanadeze ishin të interesuara për gjigandin e bakrit.
Ai tha se kushti i qeverisë është që një partner strategjik do të duhej të siguronte 300 milionë euro investime. /tesheshi.com/
