Kina thotë se do të mbështesë Kombet e Bashkuara në marrjen e masave të mëtejshme kundër Koresë së Veriut në përgjigje të provës së fundit bërthamore.
“Duke pasur parasysh zhvillimet e reja në gadishullin Korean, Këshilli i Sigurimit duhet të përgjigjet më tej dhe të marrë masat e nevojshme për të zgjidhur krizën”, ministri i Jashtëm Wang Yi gjatë një konference shtypi në Pekin.
Ai theksoi gjithashtu se “sanksionet dhe presioni” duhet të bëhen krah për krah me “dialogun dhe negociatat” me Phenianin. Kina është aleati më i madh diplomatik dhe ekonomik i Koresë së Veriut dhe pretendon se sanksionet më të forta kundër Phenianit nuk do të jenë të mjaftueshme për të ulur tensionet në Gadishullin Korean.
Të mërkurën, presidenti amerikan, Donald Trump tha se “do të shohim se çfarë do të ndodhë”, kur u pyet nëse ai do të miratojë veprime ushtarake kundër Koresë së Veriut, duke shtuar se “kjo nuk është zgjedhja e parë”. Presidenti Trump foli pas një bisede telefonike me presidentin e Kinës, Xi Jinping.
I pyetur nga Zëri i Amerikës për çfarë bisedoi me udhëheqësin kinez lidhur me Korenë e Veriut, zoti Trump u përgjigj se “presidenti Xi kërkon të bëj diçka për Korenë e Veriut” por nuk është e qartë “në se ai do të jetë në gjendje apo jo”.
Trump e cilësoi bisedën e tij me presidentin Xi “si shumë, shumë miqësore”, duke shtuar se “ishte një telefonatë shumë e mirë dhe zgjati shumë”.
Rusia është duke mbështetur gjithnjë e më shumë një strategji të kontrollit të armëve, për ta pranuar Korenë e Veriut si një shtet bërthamor, duke mos u pajtuar me Shtetet e Bashkuara dhe deri në një farë pike edhe me Kinën, që mbështesin vendosjen e sankioneve për ta detyruar Phenianin të ulet në bisedime për çarmatim bërthamor.
Ndërsa u takua me presidentin koreano-jugor në Vladivostok, presidenti rus Vladimir Putin bëri thirrje përsëri të enjten për dialog në zgjidhjen e krizës bërthamore me Korenë e Veriut dhe tha se nxitja e histerisë ushtarake rreth krizës së Koresë së Veriut ishte kundër-produktive dhe mund të shkaktojë një katastrofë globale. Ai tha gjithashtu se nuk është e mundur të zgjidhet kriza e Koresë së Veriut vetëm me sanksione dhe presion.
Shtetet e Bashkuara kanë qarkulluar te vendet anëtare të Këshillit të Sigurimit, një projekt-rezolutë për sanksione të reja ndaj Koresë së Veriut, duke kërkuar votimin e saj të hënën.
Projekt-rezoluta, që arriti të sigurohej nga Zëri i Amerikës, bën thirrje për embargo të naftës, benzinës dhe gazit të lëngshëm ndaj Koresë së Veriut.
Pheniani importon gati të gjithë naftën dhe gazin nga Kina dhe pa të, ekspertët thonë se ekonomia do të bllokohej shumë shpejt.
Projekt-rezoluta synon gjithashtu të ndërpresë ekportet e tekstileve të Koresë së Veriut që i sjellin vendit qindra miliona dollarë të ardhura në vit.
Ajo kërkon gjithashtu të forcojë kufizimet mbi mundësitë e Koresë së Veriut për të dërguar qytetarët e saj për të punuar në vende të huaja, që zakonisht iu kërkohet të dërgojnë pagat e tyre tek qeveria e Phenianit. /tesheshi.com/
