Vazhdojnë tensionet mes Kinës dhe Tajvanit.
Ministri i Jashtëm kinez Wang Yi mbajti një fjalim para Kombeve të Bashkuara, ku tha se kushdo që përpiqet të ndalojë bashkimin e Kinës dhe Tajvanit do të “dërrmohet”.
Ministri kinez përsëriti qëndrimin e vendit të tij se Tajvani është thjesht një provincë e shkëputur që përfundimisht do të duhet të kthehet nën kontrollin e Pekinit.
“Vetëm kur Kina të ribashkohet, mund të ketë paqe të vërtetë përtej ngushticës së Tajvanit”, tha Wang Yi në Asamblenë e Përgjithshme të OKB-së, duke shtuar se Pekini “do të ndërmarrë hapat më të fortë për të kundërshtuar ndërhyrjen e jashtme”.
Ai më tej pohoi se kushdo që përpiqet të ndalojë Kinën në planet e saj do të “dërrmohet nga rrotat e historisë“, duke iu referuar të gjithë atyre që nënkuptojnë se Tajvani mund të jetë një shtet më vete.
Kujtojmë se Kina mbron ashpër pretendimin e saj ndaj Tajvanit, i cili u shkëput nga kontinenti pas një lufte civile në 1949 dhe tani funksionon me qeverinë e vet. Marrëdhëniet tashmë të acaruara u përkeqësuan më tej kohët e fundit nga vizita e Nancy Pelosi, presidentes së Kongresit amerikan, në Tajvan, si dhe deklarata e presidentit amerikan Joe Biden se ai do ta mbrojë Tajvanin ushtarakisht nëse Kina e sulmon atë. /tesheshi.com/
