Kina ndërpret një praktikë ndëshkimore për prostitucion, ku punonjësit e seksit dhe klientët e tyre mund të dënohen deri në dy vjet burg në të ashtuquajturat qendra arsimore, raporton BBC. Të burgosurit u detyruan atje të merrnin pjesë në prodhimin e lodrave dhe produkteve shtëpiake. Kjo formë e ndëshkimit nuk do të praktikohet më dhe ata që ndodhen në qendra të tilla do të lirohen.
Sidoqoftë, prostitucioni mbetet i paligjshëm në Kinë, dhe ata që kapen tani do të ndëshkohen me deri në 15 ditë burg dhe 5,000 juan (rreth 640 euro).
Mediat shtetërore kineze kanë shkruar se “sistemi arsimor” ka ndihmuar shumë, pasi u prezantua më shumë se 20 vjet më parë. Por me kalimin e kohës, shkruanin ata, u bë e papërshtatshme. Një studim i bërë në 2013 nga Asia Catalyst zbuloi se nuk ishte ashtu, dhe se sistemi nuk ishte efektiv. Sipas një studimi të kryer përmes intervistave me 30 punonjës të seksit në dy qytete, ata arritën në përfundimin se qendrat e pretenduara të arsimit nuk i ndihmuan përfituesit e tyre. Ata argumentuan se ndërsa vuanin dënimin, nuk mësuan aftësi të reja që do t’i ndihmonin ata pasi të ishin liruar. Dhe të gjithë të intervistuarit u kthyen në prostitucion pasi kaluan njëfarë kohe.
Për më tepër, një studim i Human Right Ëatch i vitit 2013 që përfshin 140 punonjës seksi, klientë dhe policë, zbuloi se oficerët e policisë shpesh rrahin prostitutat për të marrë një rrëfim prej tyre.
Shen Tingting, drejtore e Asia Catalyst, tha se eleminimi i “qendrave arsimore” në të cilat punonjësit e seksit u detyruan të punojnë, ishte një hap i vogël por jo i mjaftueshëm.
“Ligjet dhe politikat kineze përqëndrohen në ndalimin dhe zhdukjen e punës seksuale, duke mos krijuar një kornizë për të siguruar shëndetin dhe sigurinë e punës së seksit si profesion,” tha ajo.
Në vitin 2013, Kina gjithashtu hoqi sistemin e “riedukimit përmes kampeve të punës” për kriminelët e imët. Por jo plotësisht. Në rajonin veriperëndimor të Xinjiang, ka akoma, siç i quajnë autoritetet, kampe arsimore vullnetare që shërbejnë për të luftuar ekstremizmin. Por organizatat e të drejtave të njeriut thonë se ata shpesh burgosin ujgurët, të cilët më pas detyrohen të heqin dorë nga feja e tyre ose ta kritikojnë atë. /tesheshi.com/
