Të premten, Kina njoftoi sanksione kundër kryetares së Dhomës së Përfaqësuesve të SHBA-së, Nancy Pelosi dhe familjes së saj, si dhe kundërmasa kundër SHBA-së lidhur me vizitën e Pelosit në Tajvan në fillim të kësaj jave, raporton AA.
Ministria e Punëve të Jashtme të Kinës tha më parë se Pelosi këmbënguli të vizitonte Tajvanin, një rajon i Kinës, të cilin ata e karakterizuan si ndërhyrje në punët e brendshme të Kinës.
Pekini njoftoi gjithashtu tetë kundërmasa ndaj SHBA-së për shkak të vizitës së Pelosit në Tajvan, e cila nuk ishte e shënuar në itinerarin e saj zyrtar të udhëtimit.
“Kjo minon shumë sovranitetin dhe integritetin territorial të Kinës, dëmton seriozisht parimin Një Kinë dhe kërcënon shumë paqen dhe stabilitetin në ngushticën e Tajvanit”, thuhet në deklaratë, duke e cilësuar vizitën e Pelosit si një provokim keqdashës.
Në deklaratë thuhej se Kina mori vendimin për të sanksionuar Pelosin dhe anëtarët e familjes së saj.
Tetë kundërmasat e shpallura nga Pekini përfshijnë anulimin e telefonatave midis zyrtarëve ushtarakë amerikanë dhe kinezë, një takim pune midis departamenteve të mbrojtjes kineze dhe amerikane dhe pezullimin e bashkëpunimit kino-amerikan për migrimin e paligjshëm, kontrollin e drogës dhe ndryshimet klimatike.
Pelosi është kryetarja e parë e Dhomës së Përfaqësuesve që viziton Tajvanin në 25 vjet.
Ajo udhëhoqi një delegacion zyrtarësh amerikanë që e nisën vizitën e tyre në këtë pjesë të botës duke shkuar të hënën në Singapor dhe më pas në Malajzi, prej nga udhëtuan për në Tajvan, gjë që shkaktoi reagime nga Pekini.
Ajo u largua nga Tajvani të mërkurën mbrëma për një vizitë në Korenë e Jugut dhe mbërriti në Tokio të enjten mbrëma. Pelosi e përfundoi vizitën e saj në vendet aziatike duke u kthyer në SHBA pasditen e së premtes. /tesheshi.com/
