Mbi 800.000 persona janë evakuuar dhe qindra fluturime janë anuluar pasi erëra që shkojnë gjer në 200 km/h po u afrohen brigjeve juglindore të Kinës.
Tajfuni Chan-Hom pritet të godasë sot pasdite qytetet bregdetare në jug të Shangait. Sipas Shërbimit Metereologjik të Kinës, ky tajfun mund të jetë më i fuqishmi që mund ta ketë goditur Kinën që nga viti 1949.
Mbi 865.000 persona u larguan nga rajonet bregdetare të provincës së Zhejiangut, e deri të dielën janë pezulluar në rajon mbi 100 linja të lëvizjes me trena.
Tajfuni ka goditur gjithashtu ishujt në Japoninë jugore, duke lënë pas të lënduar. Fuqinë e tij e kanë ndjerë dhe Filipinet e Tajvani, me një sërë fluturimesh të anuluara, e me zyrat publike e bursën të mbyllur të premten në Tajpei.
Tajfuni është stuhia e dytë që e godet Kinën gjatë dy ditëve, pasi stuhia e egër tropikale Linfa goditi bregun e provincës Guangdong, duke sjellë zhvendosjen e 56.000 personave.
