Ambasada amerikane në Tiranë dha detaje nga një vizitë e ambasadores Yuri Kim këtë të enjte në SPAK, ku u takua me kreun e ri Altin Dumani.
“Ambasadorja Yuri Kim u takua sot me Kreun e ri të SPAK, Altin Dumani, për ta uruar atë për postin e tij të ri drejtues.
Ajo ritheksoi që Shtetet e Bashkuara do të vazhdojnë të mbështesin fort zbatimin e reformës në drejtësi, një kërkesë për aspiratat e Shqipërisë për t’u anëtarësuar në Bashkimin Europian.
Në këtë drejtim dhe për të çuar përpara jetësimin e faktit që Presidenti Biden e ka identifikuar luftën kundër korrupsionit si interes thelbësor të sigurisë kombëtare të Shteteve të Bashkuara, ne do të mbëstesim plotësisht prokurorët dhe hetuesit e SPAK teksa ndërtojnë mbi sukseset e deritanishme dhe intensifikojnë ndjekjen penale të korrupsionit të nivelit të lartë dhe krimit të organizuar, në përputhje me ligjin, pa frikë apo favore. Askush nuk është mbi ligjin”, thuhet në njoftimin e ambasadës.
Siç mund të lexohet mes rreshtash të kësaj gjuhe diplomatike, kreu i ri i SPAK ka marrë një nxitje të fortë amerikane për të vepruar e mos u frenuar aspak në goditjen e të paprekshmëve deri më tani. Nga politika, kuptohet. /tesheshi.com/
