Duke mbrojtur sërish ecjen pozitive të Reformës në Drejtësi, ambasadorja Yuri Kim tha se nga SPAK shumë të paprekshmëve deri dje tashnë nuk po u zë gjumi.
“Kam dëgjuar plot histori për njerëz që nuk i zë gjumi, duke vrarë mendjen nëse e kanë radhën ata për shpalljen tjetër non-grata apo për ndjekje penale. Dhe nëse je i shqetësuar, me shumë gjasë ke arsye të forta për t’u shqetësuar. Dhe do t’iu thoja përsëri të gjithë prokurorëve, gjyqtarëve, hetuesve: bëni punën tuaj”, tha Kim në një intervistë me gazetarin Sokol Balla në Report TV.
Ndërkohë, ajo dhe njëherë lëshoi mesazhin për PD-në që mos ndjekë një “non grata” si Berisha.
“Ne e kemi bërë shpalljen (non-grata) në përputhje me interesin tonë kombëtar. Populli shqiptar, udhëheqësit shqiptarë duhet të marrin vendimin e tyre bazuar në atë që është në interesin kombëtar të Shqipërisë. Kemi opinionin tonë dhe e kemi ofruar atë, i cili është që duhet të ecni përpara.
Duhet të keni opozitë të vërtetë që jo vetëm ka ide dhe udhëheqësi, por që në fakt është e aftë të fitojë zgjedhje. Kështu që, anëtarët e Partisë Demokratike duhet të mendojnë për këtë pyetje dhe do duhet të marrin vendimin e tyre”, argumentoi Kim. /tesheshi.com/
