Shkrimtari dhe publicisti Kim Mehmeti, në një ligjëratë të mbajtur në Universitetin e Prishtinës, ka thënë se politikanët në Kosovë dhe Shqipëri kanë frikë nga publikimi i përgjimeve në Maqedoni.
“T`ua jap një informatë që e kam kështu prej burimeve të tjera: luten edhe Prishtina edhe Tirana që mos të botohen përgjimet e telefonatave që kanë të bëjnë me ministrat shqiptarë me pushtetarët këtu në Prishtinë dhe në Tiranë”, tha Mehmeti.
“A e dini pse? Sepse ata e din se çfarë kanë folur. Se sikur të kishin folur për të mirën e popullit, me të vërtetë do tu lutshin që kjo të botohej”, shtoi publicisti i njohur.
Sipas tij, nëse kjo është e vërtetë, atëherë del se ai që i ka ato përgjime i kontrollon në një farë mënyrë të gjithë nga pak.
Sa i përket gjendjes së shqiptarëve në Maqedoni, Mehmeti tha se nga viti 2000 e këndej, del se shqiptarët nuk treguam se çfarë Maqedonie duan.
“Ne kurrë nuk treguam se çfarë Maqedonie duam, me çka doli puna se maqedonasit kane projekt për Maqedoninë. Ata duan një Maqedoni që si shenjë njohëse do të kenë vetëm emblemën etnike maqedonase dhe atë sllavo ortodokse”, tha ai.
“Ata edhe me paratë tona ndërtonin kryqin që ju e shihni atje në Shkup që është shumë i madh, gjë që unë nuk kam asgjë kundër kryqit. Kryqi si objekt fetar po, por kryqi për inat timin ,jo”, tha më tej Mehmeti.
Mehmeti e përmendi edhe zhvendosjen e shtëpisë së Nënës Tereza:
“Ata e zhvendosën shtëpinë e Nënës Terezë nga vendi, e zhvendosën 100 metra më lartë vetëm që t’i zhdukin gjurmët e komunitetit katolik që ka qenë shumë i fuqishëm në Shkup”.
Po ashtu, sipas Mehmetit maqedonasit kanë ndërtuar hotel në vendin ku ka qenë Burmali Xhamia, e cila është rrënuar në vitin 1925 nga forcat serbe.
Publicisti Mehmeti u shfaq kritik edhe ndaj elitës politike në Maqedoni, pasi që sipas tij fatin e shqiptarëve në Maqedoni e morën njerëzit të cilët u bënë milionerë shumë shpejtë.
“Pala maqedonase e bërë një llogari shumë të thjeshtë, më mirë të paguash shtrenjtë 200 qind shqiptarë se sa tërë një populli. T’i japësh nga 1 milionë euro 200 shqiptarëve, bëjnë 200 milionë euro, mirëpo shqiptarëve t’u japësh 30 për qind të buxhetit, duhet ‘u japësh çdo vit kah 700 milionë euro”, tha ai.
Sipas tij, duke e bërë këtë llogari maqedonasit krijuan një Maqedoni me dy parti shqiptare të cilat e kanë kapur për fyti shqiptarinë.
“Ne kemi dy parti të cilat janë duar shqiptare që janë BDI-ja dhe PDSH-ja të cilat i kontrollon VMRO-ja, dhe këto dy duar shqiptare kanë kapur për fyti shqiptarinë”, shtoi Mehmeti. /tesheshi.com/
