Bashkimi në një front të përbashkët opozitar, por pa Menduh Thaçin, gjithnjë e më shumë po gjen përqafim nga intelektualët e vendit, të cilët jo rrallë herë kanë akuzuar dy partitë më të mëdha, për impotencë politike.
Së fundmi ka qenë publicisti Kim Mehmeti, i cili në një postim të tij në Facebook ka shkruar se kaloi koha kur mund të arsyetonim veten me “nuk e dinim çfarë njerëzish janë dhe si veprojnë” e ‘nuk kishim zgjidhje tjetër’.
Organizimin politik të shqiptarëve në Maqedoni, Mehmeti e ka ndarë në dy tabore, atë të BDI-së dhe PDSH-së, që sipas tij që do të thotë: të marrësh votën e shqiptarëve, e t’u shërbesh qarqeve politike e policore maqedonase si dhe të treshes, e cila asnjëherë nuk pati rast të jetë pjesë e ekzekutivit, RDK, Lëvizja për Ndryshime në PDSH dhe Lëvizja Besa!
“Pra, ka ardhur koha ta japim provimin e madh politik: të mos na interesojë se çka do u japin shërbëtorëve të vet shqiptarë DPMNE-ja e LSDM-ja maqedonase, por sa do përfitojë shqiptaria! Andaj nëse edhe kësaj radhe u besojmë atyre që me vite na manipuluan, atëherë nuk duhet shtruar pyetjen se cilët janë ata dhe si ata veprojnë, por cilët jemi ne dhe sa vlen guximi dhe vetëdija jonë politike!” – shkruan pena e njohur e publicistikës shqiptare, Kim Mehmeti.
Ai i shton mendimit të tij edhe një foto në të cilën është shkruar “Një popull që zgjedh në krye të vendit njerëz të korruptuar, hajdutë, maskarenj e tradhtarë…nuk është viktimë! Por është bashkëpunëtor i tyre!”. Shprehja e famshme që ka përdorur për të ilustruar shkrimin e tij z. Mehmeti, është thënë nga George Orwell /tesheshi.com/
