Media të ndryshme bëjnë me dije një debat që ka ndodhur dje në ambientet e kryeministrisë mes shefit të qeverisë shqiptare, Edi Rama dhe shkrimtarit dhe publicistit nga Maqedonia, Kim Mehmeti. Ky i fundit është ankuar për politikën e Tiranës, sipas së cilit nuk ka bërë asgjë për krijimtarinë letrare në trojet e tjera. Gazeta Shqiptare e ka sjellë më konkretë repikën mes tyre:
Kim Mehmeti: Maqedonia ka botuar dhjetëra libra të autorëve të saj. Qeveria shqiptare nuk ka botuar asgjë”.
Edi Rama: nuk mund të përcaktojnë qeveritë se cilët janë shkrimtarët që duhen botuar e kush jo. Kjo nuk është punë e qeverisë. Nëse qahesh për të ardhmen, gjysma e së keqes. Nëse qahesh për shqiptarët sot, po të them se nuk kanë qenë asnjëherë më mirë se sot shqiptarët.
Kim Mehmeti: Nëse e krahason me kohën e Turqisë… Unë e di se për ju është kot çdo gjë që thonë të tjerët.
Edi Rama: Ah, e the edhe këtë.
Kim Mehmeti: Ne kemi 25 vite në një gjendje. Që të jesh politikan i mirë, duhet të bindësh popullin që të jetë i kënaqur me atë që ka. Unë nuk bëj krahasime me të keqen që kemi pasur, por me të mirën që mund të kemi.
Edi Rama: Bëj krahasime, por mos thuaj gjëra që nuk kanë kuptim. Duke qenë shkrimtar, që nuk ke gjëra të tjera në dorë, veçse të shkruash, e meqe e kë në dorë të shkruash, ke shansin të shohësh e të mendosh gjëra që një njeri si unë nuk ka mundësi t’i mendojë. Na thuaj çfarë duhet bërë ndryshe.
Kim Mehmeti: Ne duhet të kemi politikë kulturore mbarëshqiptare.
Edi Rama: Unë nuk kam ardhur si kryeministër këtu, mos më ndërprit se nuk më komplekson dot. Për herë të parë kemi një sistem arsimor të unifikuar me Kosovën, e kupton? E ke imagjinuar ndonjëherë? Kemi kalendar të përbashkët kulturor Shqipëri-Kosovë. Çfarë do më shumë?
Edi Rama: Unë mirë që erdha këtu jo si kryeministër. Çfarë do nga unë..
Kim Mehmeti: Unë dorëzohem.
Edi Rama: Do dorëzohesh patjetër, nuk ke ku shkon.
Replikat mes tyre janë konsumuar në promovimin e një libri në ambientet e Kryeministrisë, në Qendrën për Hapje e Dialog. /tesheshi.com/
