Ambasadorja amerikane Yuri Kim u përcolli një mesazh të hidhur kundërshtarëve të Reformës në Drejtësi, atyre në politikë, se ajo do vijojë dhe me pasardhësin e saj, ambasadorin e ri.
“SHBA mbetet e përkushtuar për të mbështetur Shqipërinë. Ka kaluar mbi tre vite dhe fakt është që pas tre viteve është koha për një ambasador të ri. Të gjithë e kemi parë procesin në Ëashington.
Reforma nuk ka për të ndryshuar, ndonëse ndryshojnë ambasadorët. Shpresoj që ju do të kuptoni që kur SHBA flet për drejtësinë, e bëjnë këtë si një mik i sinqertë. Askush nuk është mbi ligjin”, tha ajo në një aktivitet me rastin e 110-vjetorit të krijimit të Gjykatës së Lartë.
Për Kim, “Reforma në Drejtësi vazhdon të prodhojë rezultate reale dhe të prekshme çdo ditë”.
“Kanë kaluar tashmë më shumë se tre vite që jam këtu dhe kam pasur privilegjin të takoj shqiptarë nga të gjithë fushat e jetës. Dhe ata më kanë thënë shumë qartë se duan drejtësi, duan mundësi dhe duan një mundësi të barabartë, një arsye për të qëndruar në këtë vend dhe për ta bërë atë vendin që duhet të jetë, një Shqipëri e mrekullueshme”, tha Kim.
Ajo thekksoi se “kundërshtarët e Reformës në Drejtësi tashmë duan që ajo të dështojë, pasi po shohin që funksionon. Ata do të donin të vazhdonin të fshihnin veprimet e tyre korruptive, do të duan të jenë në gjendje të vazhdojnë të bazohen në pandëshkueshmëri”.
Kjo sipas znj. Kim, “është një shenjë që Reforma në Drejtësi po funksionon me të vërtetë, por gjithashtu tregon se sa e rëndësishme është që të gjithë ne së bashku, Gjykata e Lartë, SHBA, BE dhe të gjithë vendet partnere dhe organizatat tona partnere të qëndrojnë të përkushtuara ndaj kësaj detyre”.
“Ne do të vazhdojmë t’ju mbështesim dhe këtë mund t’jua premtoj, kjo nuk ka për të ndryshuar”, konkludoi kryediplomatja amerikane në largim. /tesheshi.com/
