Ambasadorja Yuri Kim tha se ajo kishte shërbyer si diplomate në shumë vende por askund s’kish ndeshur harmoninë fetare që ka Shqipëria.
“Kam jetuar në vende të ndryshme gjatë karrierës sime si diplomate që nga Lindja e Largët, në Lindjen e Mesme. Kur bëhet fjalë për harmoninë ndërfetare, Shqipëria është shumë e veçantë.
Mjafton të hidhni sytë përreth kësaj salle, ose të ecim në rrugë duke kaluar pranë xhamive, katedraleve, kishave dhe teqeve.
Kam dëgjuar histori të ndryshme në bisedat me personelin tim shqiptar. Një baba ortodoks dhe nënë myslimane, një gjysh bektashi dhe gjyshe katolike, vëllezër e motra ungjillorë, por një familje, një familje shqiptare”, u shpreh Kim, e pranishme sot në forumin “Vëllazëri në humanizëm” të Këshillit Ndërfetar.
“Ndërsa këtë vit nisim 100-vjetorin e marrëdhënieve SHBA-Shqipëri, do të shfrytëzoj çdo mundësi për të theksuar vlerat tona të përbashkëta të tolerancës dhe të përfshirjes. Nuk është e tepruar të thuhet se Shqipëria shihet si një lider botëror kur bëhet fjalë për lirinë fetare dhe harmoninë ndërfetare”, theksoi më tej gruaja që përfaqëson SHBA në Shqipëri. /tesheshi.com/
