Kombëtarja shqiptare ka dështuar tërësisht përballë Kilit latinoamerikan në një miqësore në Parma. Pas kualifikimit në Europian, aty ku e presin sfida të mëdha, kuqezinjtë janë testuar me një ekip që merr pjesë rregullisht në Botëror, duke u turpëruar me rezultatin 3:0.
Ekipi i brazilianit Silvinjo ishte pa pikë zemre e shkëlqimi në një lojë që, nëse do i ketë kështu dhe në Gjermani pas pak muajsh, do bëhet gazi i botës në Europian.
“Kili është skuadër e nivelit të lartë, agresive dhe me histori të madhe. Lojtarë me kualitet të lartë, Sanchez, Diaz, Isla, Bravo, kanë fituar dy herë Copa America, luajnë në Botëror. Na duhet të përballemi me nivele shumë të larta gjithnjë e më shumë”, tha Silvinjo pas ndeshjes.
“Nuk më pëlqeu fare”, theksoi ai. “Jemi skuadër që duhet të bëjmë luftë në 90 minuta. Pasi pësuam gol ne duhet të futeshim në lojë. Duhet një nivel akoma më i larë. Duhet të reagonim si në Varshavë dhe Pragë”, tha braziliani nën dëshpërim. /tesheshi.com/
