Në orët e para të së hënës, në “MetLife Stadium” të Nju Xhersit, atmosfera do të jetë elektrizuese, pasi në finalen e Kupës së Amerikës do të ndeshen dy finalistët e vitit të shkuar: Kili dhe Argjentina.
Një vit më parë fitonte Kili me 11-metërsha në finalen e luajtur në Santiago, ndërkohë që loja e rregullt kishte përfunduar 0-0. Këtë vit kemi sërish një Kili në formë, por po ashtu kemi dhe një Argjentinë në formë, me Messi-n që është paraqitur shumë herë më mirë se herët e tjera me përfaqësuesen.
Kili do të fitonte këtë të enjte 2-0 ndaj Kolumbisë, në gjysmëfinalen e luajtur në Çikago. Golat do të vinin shumë shpejt për kilianët, që më tutje do të kërkonin vetëm ta administronin rezultatin. Fillimisht do të shënonte Aranguiz në minutën e 7-të, e katër minuta më pas Fuenzalida do t’i thellonte shifrat.
Edhe pse pa Vidal-in, që mungonte për shkak të kartonave të marrë, kilianët do të kishin Alexis Sanchez-in, që do t’i jepte tonin lojës së skuadrës së tij. Portieri Bravo gjithashtu do të ishte i pakapërcyeshëm.
Në një gjysmëfinale me shumë kartona të verdhë, kolumbianët do të përpiqeshin fort për të fituar, por pa mundur të bëjnë kështu. Pa vajtur asnjëherë në finale që nga 2001-shi, kolumbianët e kërkuan pa mbarim fitoren, veçse pa sukses.
Pas pjesës së parë, ndeshja do të pezullohej për më tepër se dy orë për shkak të furtunës mbi Çikago. 45 minutat e dyta nuk do të ndryshonin gjë në rezultatin e përgjithshëm, në favor të kilianëve. Kolumbianët do të mbeteshin dhe me dhjetë lojtarë pas daljes me të kuqe të Carlos Sanchez-it.
Kolumbia dhe SHBA-të do të luajnë mes tyre për vendin e tretë në Kupën e Amerikës. Ky do të jetë një takim i përsëritur, pasi dy përfaqësueset u ndeshën dhe në sfidën hapëse të veprimtarisë, të fituar 2-0 nga kolumbianët. /tesheshi.com/
