Kili synon të hapë një ambasadë në Palestinë, tha presidenti kilian Gabriel Boriç, duke shtuar se vendi i Amerikës së Jugut do t’i bashkohet radhëve të vendeve që kanë një zyrë në nivel ambasade në territorin e kontestuar nga Palestina me Izraelin.
Ministrja e Jashtme kiliane Antonia Urrejola konfirmoi planin të enjten, por tha se një afat kohor ende nuk është caktuar dhe se Kili vazhdon të njohë Palestinën dhe Izraelin si shtete legjitime, raporton Reuters.
Presidenti majtist Boriç, i cili ka shprehur vazhdimisht mbështetjen e tij për kërkesat e popullit palestinez për një shtet të pavarur, e komentoi planin në një ceremoni private në Santiago të organizuar nga diaspora palestineze.
Boriç: Po e vë veten në rrezik
“Unë po rrezikoj me këtë… ne do ta ngremë përfaqësimin tonë zyrtar në Palestinë nga [niveli] i të ngarkuarit me punë; tani do ta hapim ambasadën”, tha Boriç, pa dhënë detaje për vendndodhjen e ambasadës së ardhshme.
Një zëdhënës i ambasadës izraelite në Kili tha se nuk do të komentonte publikisht për rastin.
Ministria e Jashtme palestineze nuk iu përgjigj menjëherë një kërkese për koment pas orarit të punës.
Territoret palestineze, të cilat palestinezët duan të njihen si shtet, përfshijnë Bregun Perëndimor, Rripin e Gazës dhe kontrollin e kontestuar të Jeruzalemit Lindor. Izraeli i pushtoi këto zona në luftën e Lindjes së Mesme të vitit 1967. /tesheshi.com/
