Anika Dokle, vajza e politikanit të njohur socialist, Namik Dokle, ka pësuar së fundi një goditje të rëndë në prestigjin e saj si një opozitare e hidhur karshi politikave të qeverisë Rama, ndërtuar për tre vjet me radhë duke u shprehur në rrjete sociale. Gazetari Mentor Kikia, i ka përmendur asaj një rast të freskët ku ajo si doktoreshë i ka marrë para një pacienteje. Kikia ka qenë konkret në denoncimin e tij:
“Doktoreshë Anika! Ti në datën 18 Mars të këtij viti, ditë e premte, operove një grua të moshuar, rreth 70 vjeç, L.Y, pensioniste, që merr vetëm 100 mijë lekë të vjetra në muaj. I hoqe mitrën! Gjatë 4 ditëve të qëndrimit të saj në spital, ke shkuar vetëm një herë, për ta parë; madje nuk po shkoje as t’i firmosje daljen nga spitali, me gjithë insistimin e familjarëve. Prandaj familjarët e saj u detyruan të të paguanin 200 mijë lekë të vjetra. Ti nuk ua kërkove paratë, kjo është e vërtetë, por soji juaj nuk kërkon, por të lënë njeriun të dergjet në krevat dhe ky është kodi që tregon se ju duhet të paguheni. Mbase 200 mijë lekë mund të jenë pak për ty, por për ata janë shumë”.
Ky reagim i Kikisë ka ardhur pasi Anika ka marrë një mesazh të parë prej tij që mos bënte moral – dhe fjala është për rastin e vdekjes së një gruaje dhe foshnjës së saj në maternitetin “Koço Gliozheni” në Tiranë – gjersa u kishte futur dorën në xhep pacientëve. Por zonja Dokle ka reaguar duke e quajtur gazetarin si pa identitet dhe shantazhues, çka ka bërë që prej këtij të fundit të specifikohet akoma më shumë rasti i marrjes së parave.
Situata në fjalë nxjerr në pah një sëmundje tjetër tipike shqiptare: afshin për të denoncuar të keqen, teksa çdo ditë e mbjellin dhe e kultivojnë atë në forma nga më të ndryshmet.
Prej sot, bie dhe miti i i vajzës së Namikut që ia bën 8 me 2 qeverisë së partisë së babait. /tesheshi.com/
