Komisioni i Lartë i Këshillit të Europës për të Drejtat e Njeriut në Strasburg dhe ai i OKB-së me seli në Gjenevë, kanë depozituar një raport mbi situatën alarmante e të drejtave të Njeriut në Preshevë, Bujanoc dhe Medvegjë, raport ky i nënshkruar nga Kryetari i Komisionit për të Drejtat e Njeriut në Preshevë, Belgzim Kamberi.
Siç bën të ditur Presheva jonë, në këtë thuhet se “në tri komunat shqiptare në Serbi nuk ka pasur progres thelbësor në fushën e të drejtave individuale dhe kolektive të njeriut, pasi autoritetet shtetërore nuk arritën të kryejnë qoftë edhe një projekt të rëndësishëm për të ndihmuar komunitetin shqiptar.”
Në raport bëhet e ditur se edhe pse Serbia ka bërë progres në disa fusha brenda vendit, ajo vazhdon të diskriminojë shqiptarët që jetojnë në Luginën e Preshvës.
Sipas raportit, “modeli Kushtetues i Serbisë me legjislacionin përcjellës mbetet kësisoj pengesë serioze për të drejtat dhe zhvillimin e komuniteteve minoritare në përgjithësi dhe ato kombëtare në veçanti”. /tesheshi.com/
