Në një dalje në një konferencë shtypi nga Londra, Mikhail Khodorkovsky, një prej kritikëve më të ashpër të regjimit të Kremlinit dhe një industrialist tashmë në mërgim, ka deklaruar hapur se revolucioni në Rusi është i pashmangshëm dhe i nevojshëm.
Çështja është se si ta bëjmë këtë revolucion relativisht paqësor, tha ai, duke e akuzuar pushtetin aktual në Rusi për ndjekjen e një politike të jashtme vetëvrasëse, si dhe për procedimin e qytetarëve me anë të gjykatave të korruptuara.
“Revolucioni në Rusi është i pashmangshëm. Mbetjet e rezervave dhe kërcënimi për shtypje thjesht po e shtyjnë arritjen e tij,” është shprehur njeriu i kthyer në simbol të rezistencës ndaj pushtetit absolut të Putinit.
Rusia ka rezerva të mjaftueshme deri në 2017-ën, shpjegoi ai, duke parashikuar kolapsin ekonomik me mbarimin e tyre.
Khodorkovsky tregoi se nuk ishte i interesuar për politikën për hir të saj, por tha se nuk mund të qëndronte duarkryq e të shihte atë që po ndodh në Rusi.
“Do të bëj ç’të mundem që rendi ligjor të rivendoset përmes një revolucioni,” e ka bërë të qartë synimin e vet kundërshtari i Putinit, që një pjesë të mirë të jetës e çoi në burg me akuza të montuara. /tesheshi.com/
