KFOR ka reaguar sërish ndaj një paranoje serbe të radhës për kërcënim shqiptar në Veri, pas pranisë aty të disa trupave shqiptare në kuadër të stërvitjeve të NATO-s.
Zëdhënësi i KFOR-it Vincenzo Grasso tha frikërat janë produkte mediatike, referuar gazetës serbe Novosti.
“E vetmja gjë që paralajmëron destabilizim janë spekulimet e shpeshta të cilat po i përhapin disa media, duke shkaktuar një tension të paarsyeshëm tek popullata”, tha Grasso.
Sipas tij, një stërvitje e përbashkët e forcave të ushtrisë shqiptare me ato të Sigurisë të Kosovës, ka të bëjë me stërvitjen e aftësive të kërkim shpëtimit.
“Stërvitjet e përbashkëta të Ushtrisë së Shqipërisë dhe Forcës së Sigurisë së Kosovës ka të bëjë me stërvitjen e aftësive të kërkim shpëtimit. Por, në disa media kjo u prezantua si një kërcënim nga aksione të organizuara të dhunshme në veri të Kosovës. Kjo stërvitje në asnjë mënyrë nuk ka ndikuar në misionin e KFOR-it”, tha Grasso. /tesheshi.com/
