KFOR: Kosova mund të përdor Bayraktar-in, por….

Misioni paqeruajtës i NATO-s në Kosovë (KFOR) njoftoi se Forcat e Sigurisë së Kosovës mund të përdorin dronët Bayrakta TB 2 vetëm me miratimin e komandantit të KFOR-it.

KFOR-i njoftoi se “lidhur me përdorimin e të gjitha kategorive të dronëve dhe kufizimet përkatëse, përfshirë Bayraktar TB-2, sipas Rezolutës 1244 të Këshillit të Sigurimit të Kombeve të Bashkuara nga viti 1999, komandanti i KFOR-it ka autoritetin parësor për hapësirën ajrore mbi Kosovë”.

“Hapësira e sipërme ajrore e Kosovës mund të përdoret vetëm për kalimin e Kosovës nga një vend në tjetrin me fluturime komerciale, dhe hapësira e poshtme ajrore mund të përdoret për nevoja të veçanta, rast pas rasti dhe me miratimin paraprak të komandantit të KFOR-it. Presim që institucionet në Kosovë të ofrojnë koordinim dhe të respektojnë procedurat ekzistuese”, thonë nga KFOR-i.

KFOR-i vazhdon të mbështesë zhvillimin e Forcës së Sigurisë së Kosovës brenda mandatit të saj fillestar, duke përfshirë operacionet e mbrojtjes civile si shuarja e zjarrit, asgjësimi i mjeteve shpërthyese, kërkimi dhe shpëtimi dhe reagimi ndaj derdhjeve të materialeve të rrezikshme.

KFOR-i mbetet plotësisht i fokusuar në ofrimin e një mjedisi të sigurt dhe lirinë e lëvizjes për të gjitha komunitetet në Kosovë, në përputhje me mandatin e lartpërmendur të OKB-së.

Ky reagim i trupës së NATO-s në Kosovë vjen një ditë pasi kryeministri Kurti bëri me dije se qeveria e Kosovës ka blerë një mjet ajrore turke pa pilot, dronin Bayraktar TB-2, për Forcat e Sigurisë së Kosovës.

Kurti postoi fotografi të dronit në Facebook dhe ka thënë se oficerët e Forcave të Sigurisë së Kosovës (FSK) kanë përfunduar trajnimin për përdorimin e tij.

Ky zhvillim vjen kohën e një tensioni mes Kosovës dhe Serbisë për shkak të veriut, ku nuk ka munguar dhe gjuha e luftës. /tesheshi.com/