Trupat italiane nga komponenti rezervë i Forcave Paqeruajtëse Ndërkombëtare (KFOR) të udhëhequr nga NATO janë vendosur për të mbështetur misionin e NATO-s në Kosovë, transmeton Anadolu.
Siç raportojnë mediat kosovare, ardhja e tyre ka shtuar praninë e KFOR-it.
Ky mision njoftoi se bëhej fjalë për një dislokim të përkohshëm të më shumë se 200 ushtarëve të brigadës së mekanizuar të këmbësorisë italiane “Sassari”.
“Në muajt e ardhshëm, ata do të kryejnë një sërë aktivitetesh, së bashku me trupat e KFOR-it, dhe do të vendosen në përgjigje të të gjitha ngjarjeve relevante që kanë të bëjnë me situatën e sigurisë, duke përfshirë edhe periudhën zgjedhore,” thanë ata.
Ekspozimi i vazhdueshëm ndaj përshkallëzimit të mundshëm
KFOR-i theksoi se ata kontribuojnë për një mjedis të sigurt për të gjithë qytetarët dhe se bashkëpunojnë ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX).
Komandanti i KFOR-it, gjeneral Enrico Barduani, së fundi tha për KoSSev se situata në Kosovë është paqësore, por edhe e ndjeshme me “ekspozim të vazhdueshëm ndaj përshkallëzimit të mundshëm”.
“Sulmi i fundit në kanalin ujor Ibër-Lepenc nxjerr në pah cenueshmërinë e situatës së sigurisë në Kosovë. KFOR-i do të punojë ngushtë me autoritetet e sigurisë së Kosovës dhe komunitetin ndërkombëtar për të mbështetur sigurinë në lidhje me zgjedhjet e ardhshme. Nëse situata e kërkon këtë, NATO ka gjithashtu aftësinë të përforcojë menjëherë KFOR-in përmes njësive të ndryshme të forcave rezervë,” tha komandanti i KFOR-it në atë kohë.
Zgjedhjet e rregullta parlamentare në Kosovë do të mbahen më 9 shkurt. /tesheshi.com/
