Alarmante mund të vlerësohet, madje dhe dramatike, gjendja e tre fëmijëve në fshatin Bushnesh të Krujës. Ata janë prej tre ditësh të pangrënë, nëna e tyre është e sëmurë në spital dhe, sikur të mos mjaftonte kjo situatë, atyre u mungon dhe energjia elektrike.
Duket e pabesueshme por ja që ndodh në vitin 2016, vetëm 40 km nga metropoli shqiptar, ku varfëria është e pakufishme dhe ku dhe çdokujt do t’i dhembë shpirti teksa sheh këta fëmijë në luftë me urinë. Si munden këta politikanë dhe qeveritarë të kapërdisen zyrave, kafeneve e lokaleve duke shijuar çfarë ua ka ënda, ndërkohë që këtyre tre vogëlushëve u mungon kafshata e gojës?!
Kjo skamje është në familjen e Agim Myrtajt në Bushnesh të Krujës. 56-vjeçar i gjorë, ky hallexhi i këtij shekulli, humbi dhe punën e krahut si punëtor i mirëmbajtjes së rrugëve rurale për shkak se nuk ishte i rreshtuar politikisht siç duhet(!)
Vërtet që Agim Myrta paska bërë një proçkë duke mos ia dhënë votën pushtetit, por ç’faj kanë tre fëmijët e tij që nuk ushqehen dot me një kafshatë?!
Por dhe banesën që kanë, atë ku fusin kokoën, mund ta humbin nga dita në ditë, pasi pronari mundet t’i largojëqë aty.
E zonja e shtëpisë ndodhet e shtruar në spitalet e Tiranës dhe për të janë duke u kujdesur fqinjët dhe të afërmit. Ndonëse dhe rrezikojnë nga shembja e banesës kjo nuk i trishton, por mungesa e bukës së gojës duket e trishtueshme. Kjo është situata rrënqethëse e familjes Myrta, ku barra e rëndë e përgjegjësisë u mbetet atyre që drejtojnë punët e vendit, në nivel qëndror apo lokal.
Ahmet Zani – /tesheshi.com/
