Hasan Riza Gunay nga Turqia prej 11 vitesh fiton bukën e gojës duke u zhdëpur nga persona që duan të largojnë stresin dhe shqetësimet e përditshme pikërisht duke zhdëpur diku, si një çlirim energjish negative.
Gunay është personi i parë i regjistruar në Turqi që e kryen këtë punë me emrin “trajnuesi i stresit” dhe që siguron jetesën në këtë mënyrë të pazakontë.
Pasi humbi punën, ky turk, i frymëzuar nga një skenë e një filmi të aktorit bashkëatdhetar Kemal Sunal, vendosi në vitin 2010 të niste biznesin e tij. Më saktësisht, ai vendosi në këmbim të parave të rrihej nga njerëz të mërzitur, të zemëruar me shefin, burrin ose gruan dhe që në këtë mënyrë të mund të largonin disi stresin dhe problemet me të cilat përballeshin.
Aplikimi i tij për këtë lloj pune u miratua në vitin 2012 dhe ai u bë i pari i regjistruar në Turqi që fiton bukën e gojës duke marrë rrahje nga persona të tjerë.
Në një intervistë për AA, Gunay shpjegoi se “trajnuesi i stresit” është një person që ofron mbështetje profesionale dhe organizon ngjarje për njerëzit që vuajnë nga depresioni, sulmet e panikut, stresi dhe sëmundje të tjera mendore.
“Si trajnues stresi përdor metodën e të bërtiturit, të thirrurit, për t’i bërë njerëzit të heqin qafe mendimet dhe emocionet negative si ankthi, zemërimi, xhelozia dhe frika.
Gjithashtu, si metodë mbaj një maskë të përgatitur sipas një fotoje të personit që u zemërua apo mashtroi klientin tim. Unë krijoj një atmosferë të tillë për të ofruar një ambient relaksi”, tha Gunay.
Një nga seancat e tij zgjat nga 10 deri në 15 minuta.
“Unë e kuptoj menjëherë kur një klient dëshiron të kënaqë egon e tij. Më pas vendos një çmim special.
Gjithashtu nuk shkoj te çdo klient. Kur takohemi ballë për ballë, kuptoj pse ka ardhur dikush.
Numri maksimal i klientëve në ditë është dy deri në katër. Unë ofroj shërbime në shtëpitë e klientëve, zyrat apo palestrat,” rrëfen ai.
Ai theksoi se në punën e tij vepron në mënyrë profesionale dhe e ndjen veten sikur është në teatër apo film.
“Unë nuk ndihem aspak i ofenduar për shkak të fjalëve të shëmtuara që më thonë klientët e mi, sepse ata në fakt nuk ndiejnë armiqësi ndaj meje si person,” tha Gunay.
Gjatë kryerjes së punës, ai merr masat e nevojshme për të parandaluar që klientët ta lëndojnë dhe të dëmtojnë trupin e tij.
“Forca mesatare e një gruaje është në nivelin e forcës së një djali të moshës 12 deri në 14 vjeç. Më rrahin në të gjithë trupin, përveç hundës dhe shpinës. U jap disa doreza boksi. Kur punoj me burra atëherë mbrohem më mirë”, tha Gunay.
Duke vënë në dukje se femrat kanë më shumë probleme në jetën e përditshme, ai shton se ato përbëjnë 70 për qind të klientëve të tij.
Ky turk është i gatshëm të trajnojë ata që duan të bëhen “trajnues stresi” si ai dhe, siç thotë vetë, pas tre deri në pesë vjet planifikon t’ua lërë këtë punë më të rinjve. /tesheshi.com/
