Presidenti i Serbisë, Aleksandar Vuçiç, duke folur për televizionin amerikan CNN, tha se pala serbe i ka zbatuar të gjitha obligimet ndërkombëtare nga Marrëveshja e Brukselit dhe se pala kosovare nuk e ka përmbushur atë që ka pasur – formimin e Bashkësisë së Komunave me një shumicë serbe.
Vuçiç ka theksuar se që nga ardhja në pushtet e kryeministrit të Kosovës, Albin Kurti, ka pasur 353 sulme me motive etnike ndaj serbëve, duke shtuar se ky është numri më i madh i incidenteve të tilla që nga shpallja e pavarësisë së Kosovës.
“Vetëm këtë vit pati pesë të shtëna kundër civilëve të kombësisë serbe. Serbët duan vetëm siguri dhe siguri për veten dhe familjet e tyre,” tha Vuçiç.
Ai mohoi akuzat e Kurtit se i ka shantazhuar serbët që të mos votojnë në zgjedhjet lokale në veri të Kosovës, duke e pyetur mikpritësen nëse ajo kishte parë ndonjëherë zgjedhje legjitime demokratike në të cilat dolën pak më shumë se tre përqind e votuesve.
Vuçiq ka theksuar se Serbia është e kënaqur me deklaratat e sekretarit amerikan të shtetit Antony Blinken dhe presidentit francez Emmanuel Macron lidhur me krizën në Kosovë.
Ai shtoi se Serbia nuk ka shkelur asnjë marrëveshje ndërkombëtare në reagimin e saj ndaj krizës.
“Ne kemi respektuar edhe Marrëveshjen e Paqes të Kumanovës edhe Rezolutën 1244 të OKB-së. Në Kosovë nuk kemi hyrë me asnjë ushtar. Deri më tani kemi pasur bashkëpunim të mirë dhe profesional me trupat e NATO-s në Kosovë dhe jam i bindur se një bashkëpunim i tillë do të vazhdojë”, tha Vuçiç.
I pyetur se çfarë ka për t’u thënë qytetarëve protestues në veri të Kosovës, presidenti i Serbisë tha se është thelbësore të ruhet paqja dhe stabiliteti.
“Unë e di që ata janë të vendosur të mbrojnë vatrat e tyre dhe u kërkoj të luftojnë në mënyrë paqësore dhe të ruajnë paqen dhe stabilitetin. Duhet të flasim me shqiptarët që të zbatohen të gjitha marrëveshjet ndërkombëtare. Por do të kërkoja edhe përfaqësuesit e bashkësisë ndërkombëtare të ndërmarrë veprime vendimtare kundër atyre, veprimet e të cilëve kërcënojnë paqen dhe stabilitetin e të gjithëve ne”, tha Vuçiç. /tesheshi.com/
