Nga Blendi Gashi
Ish-“Miss Kosova Univers 2010”, Kështjella Pepshi ka bërë një kapërcim të madh në profesion: nga sfilimi ia ka mësyrë politikës, konkretisht Parlamentit të Zvicrës. Është kandidate e CVP-së, me të cilën parti garon në zgjedhjet nacionale që mbahen më 18 tetor të këtij viti në Zvicër.
Modelja kosovare shpreson shumë se me përkrahjen edhe të mërgatës sonë do të jetë pjesë e parlamentin zviceran.
Kështjella ka filluar fushatën për këto zgjedhje dhe portali tesheshi.com, ka realizuar një intervistë për të mësuar më shumë për planet e saj dhe në përgjithësi pse ajo zgjodhi që të merret me politikë…
Na tregoni kush është Kështjella Pepshi, nga jeni, shkollimi…?
Jam nga Peja, jetoj në Zvicër, kantoni Bernë. Kam të kryer Dermatologji Kozmetike dhe posedoi studion time.
Ju përshëndes dhe ju falënderoj për kohën dhe realizimin e kësaj intervistë duke më mbështetur kështu në këtë kohë fushate për zgjedhjet parlamentare që po mbahen në Zvicër ku jam kandidate e partisë CVP.
Nga modelimi në politikë. Pse vendosët ta bëni këtë ‘kapërcim’ të madh? Sa janë larg mes vete këto dy profesione?
Po, vendosa ta bëj këtë ‘kapërcim’ në politikë sepse unë jam rritur në frymën politike. Prindërit e mi janë marrë me politikë dhe nëna ime vazhdon edhe sot aktivitetin e saj politik.
Kjo pra është arsyeja që unë me vëllaun tim, Kreshnikun, çdo herë kemi qenë shoqërues të mamit, si në manifestime kombëtare ashtu edhe në tubime politike që organizoheshin në Zvicër nga LDK-ja, ku nëna ime ishte nënkryetare.
Kurrë nuk i jemi ndarë asaj, dhe kjo, mua dhe vëllaut tim sikur na ushqeu me dashuri për vendin tonë, duke reflektuar me kyçjen time në politikën zvicerane në partinë CVP.
Dy profesionet që ushtroj mund të them se janë të lidhura me njëra-tjetrën sepse të dyja janë ambasadorë të mirë për vendin.
Na tregoni si u bë që të kandidoni për deputete në Parlamentin nacional të Zvicrës nga CVP?
Jam kandiduar përmes PSHDK dhe CVP e ka pritur mjaft mirë kandidaturën time. Ajo e ka parë aktivitetin tim serioz ku brenda tre muajve kam dhënë në media zvicerane 28 intervista, si në ato të shkruara, elektronike dhe TV zvicerane, lokale e kantonale dhe radio gjithashtu.
Kështu CVP e kënaqur me punën time, vendosi të më rangoi më së larti nga të gjitha partitë tjera që kanë kandidatë me origjina të ndryshme. Më ranguan në nr. 7, për çka i falënderoj dhe ju uroj fitore në zgjedhjet parlamentare. Këtu duhet të mos harrohen edhe mediat tona shqiptare që më përkrahën me shkrime dhe intervista.
Si po shkon fushata zgjedhore dhe si ishte për ju që të kërkoni votat e bashkatdhetarëve në Zvicër?
Fushata po ecën mirë duke mos harruar që t’i falënderoj grupet punuese (shtabet zgjedhore), të cilat i kanë organizuar miqtë e nënës sime. Por, nga zemra i falënderoi të gjithë votuesit që me aq dëshirë e gëzim po votojnë. Përgjithësisht uroj ta kenë bekimin e Zotit familjarisht.
Nga kush mendon se do të fitosh vota më shumë, nga komuniteti ynë shqiptar apo nga zviceranët?
Kjo është pyetja më e mirë. Por, unë besoj shumë në të dy komunitetet, por kuptohet pres vota nga komuniteti im sepse jam e juaja.
Jeni zgjedhur ‘Miss Kosova Univers 2010’, a prisni të zgjidheni edhe deputete?
Unë jam tip që kam dëshirë të punoj me seriozitet dhe kur marr një detyrë punoj shumë që ta arrij atë sfidë. I kam kapërcyer disa sfida falë mbështetjes së nënës dhe vëllaut Kreshnikut, por edhe miqve.
Por, para vetes kam një sfidë tjetër me përgjegjësi më të madhe, të fitoj një ulëse në Parlamentin e Zvicrës. Por kjo varet nga votuesit se sa do të dalin në votime, sidomos shqiptarët sepse ata do ta mundësonin këtë moment historik për ne dhe shtetin e Zvicrës.
Nëse do të jesh pjesë e parlamentit zviceran, fokusi juaj do të jetë…?
Fokus im është për një integrim sa më të mirë, për një rini më sociale e jo virtuale, për të drejtat e lehonave që të jenë pranë fëmijëve të tyre, që pra hapat e parë t’i kenë nga nëna dhe kurrsesi nga një tjetër.
Nëse dështoni të hyni në parlament, a do të vazhdoni ende të merreni me politikë apo do të tërhiqeni?
Jo, nuk tërhiqem nga politika, përkundrazi do të vazhdoj edhe me më përkushtim sepse kjo është edhe dëshirë e imja.
Pse vendose të futeni në politikën zvicerane e jo në politikën kosovare?
Në politikën zvicerane vendosa të merrem sepse unë jam e lindur, rritur e shkolluar në Zvicër, ky është vendi im i lindjes, pas vendilindjes time Kosovës. Që të dyja për mua janë të dashura dhe të lidhura në një mitër.
Zvicra është shteti mik i Kosovës dhe ne bëjmë mirë kur kyçemi në vendin mik dhe japim së paku kështu një falënderim për të mirat që ka bërë Zvicra për Kosovën.
Cili është politikani shqiptar i preferuar i Kështjellës?
Për mua idoli që ka mbetur në shpirtin e zemren time, ishte dhe vazhdon të mbetet presidenti historik, Dr. Ibrahim Rugova.
Mesazhi juaj për shqiptarët është…?
Mesazhi im është që ta duam njëri-tjetrin si shqiptarë; t’i tregojmë botës se ne jemi popull i lashtë me traditë e kulturë të madhe. Të bëhemi ambasadorë të mirë për vendin tonë.
Në fund, me shumë respekt ftoj shqiptarët në Zvicër që të votojnë sepse kanë bijt e bijat e tyre që po luftojnë për ulëset në parlament në zgjedhet e 18 tetorit. Kanë krenarinë e tyre dhe duhet të mos hezitojnë.
Pra, i ftoj të votojnë me shumë respekt dhe uroj ta kenë bekimin e Zotit.
/tesheshi.com/
