Sumaya Abdel Qader, 38 vjeçare sociologe me profesion dhe aktiviste për të drejtat e njeriut, gjatë zgjedhjeve lokale në Milano të mbajtura me 5 qershor, ka fituar mbi 1,000 vota duke siguruar kështu një karrige në bashkinë e këtij qyteti.
Milano është një qytet në krahinën veriore të Lombardisë, në të cilin vitin e kaluar ligjvënësit kanë tentuar të implementojnë ligje “anti-xhami”, të cilat më vonë janë përmbysur nga Gjykata më e Lartë e Italisë, megjithëse politikanët me retorikë anti-emigracion dhe qasje anti-islame mbeten ende të zëshëm.
Sumaya, anëtare e Partisë Demokratike e qendrës së majtë, arriti në maje të karrierës së saj në një qytet i cili njihet për një kohë të gjatë si bastion i të djathtëve konservatorë italian.
Abdel Qader, me origjinë jordaniano-palestineze, e lindur në Perugia ka udhëhequr një fushatë të suksesshme, duke u përballur jo rrallë me ndjenja islamofobe të shfaqura nga disa prej kundërkandidatëve të saj gjatë gjithë fushatës.
Anëtarët e Partisë së Sumaya-s e përshkruajnë atë si një person shumë komunikativ dhe të hapur, e gatshme gjithmonë të ndërtojë ura lidhëse në mes njerëzve.
Gjatë një interviste për Al Jazeera, ajo përshkruan rrugëtimin e saj personal në politikën italiane, sfidat me të cilat ballafaqohet dhe shpërblimet të cilat ka vjelur gjatë këtij rrugëtimi.
Gjatë intervistës, ajo përshkruan çështjen e mbulesës së femrës myslimane dhe debatin e provokuar në lidhje me raportin në mes islamit dhe sekularizmit si tejet të komplikuar. Mbulesa sipas saj, është shenja më dalluese, e cila pastaj sjell barirera, shqetësime dhe mosbesim në mes të njerëzve. Mbulesa nxit qëndrimet më të rënda kolonialiste dhe racise ndaj femrës myslimane.
“Disa e shohin mbulesën kontradiktore me laicitetin, por mbulesa nuk duhet të shihet si simbol fetar”, thotë Sumaya. “Ajo është një veprim që buron nga besimi i saj, një veprim i lirë dhe personal në një shteg të ndjekur nga ata që veprojnë në përputhje me normat kuranore”.
E pyetur pse shumë njerëz e shohin mbulesën si një kërcënim, Sumaya thotë se fatkeqësisht disa e kanë zvogluar hixhabin në një simbol, duke e konsideruar atë si nënshtrim, mohim të lirisë së femrës dhe largim të saj nga sferat sociale të jetës. Për më tepër, mbulesa ndonjëherë është parë edhe si një pushtim i hapsirës publike nga islami, madje edhe si një kërcnim, duke e lidhur islamin për organizatën terroriste të ISIS-it.
“Por është gabim që të krahasohet në këtë mënyrë kjo fe që nuk ka të bëjë asgjë me këta kriminelë”, thotë ajo, duke vazhduar më tej:
“Disa njerëz dëshirojnë të përjashtojnë mbulesën nga jeta publike, për shkak se këta njerëz e shohin sekularizmin si një mungesë totale të fesë në këtë sferë, por në anën tjetër ata nuk e shohin praninë e kryqeve në Gjykatat italiane. Kjo vetëm tregon për standarde të dyfishta ndaj të cilave jemi të ekspozuar si shoqëri”.
E pyetur për synimet e saj në postin e ri, Sumaya thotë se do të punojë që qyteti i Milanos të vlerësohet edhe më shumë nga milanezët, por edhe të huajt poaq.
Përgatiti: Jeton Zenuni
Marrë nga Al Jazeera- /tesheshi.com/
