I emëruar ditët e fundit si këshilltari për sigurinë kombëtare në administratën e Trump-it, Herbert McMaster ka dalë shpejt kundër rrymës, duke shprehur mospëlqimin për përdorimin e termit “terrorizmi radikal islamik”.
Një gjenerallejtënant, ai i ka deklaruar personelit të tij se nuk dëshironte ta përdorte këtë term, sepse ndëshkonte një fe të tërë.
Për të, terroristët janë në thelb “joislamë”, e nuk kanë asnjë lidhje me Islamin.
The Guardian citon një pjesëmarrës në takim të ketë deklaruar për McMaster-in se, “Ai tha se nuk donte ta quante atë terrorizëm radikal islamik ngaqë terroristët janë ‘joislamë’”.
Një kolonel në pension i ushtrisë amerikane, Peter R. Mansoor, që ka shërbyer në Irak me këshilltarin e ri të sigurisë kombëtare, pati deklaruar më herët se McMaster-i “nuk e shihte absolutisht Islamin si armik”.
Termi për të cilin bëhet fjalë është parë prej kohësh si i diskutueshëm, i konsideruar si një mënyrë për stigmatizimin e Islamit dhe për t’i futur në një thes të gjithë muslimanët si “terroristë”.
McMaster-i e ka shprehur qasjen e tij vetëm pak ditë pasi zëvendësoi të dorëhequrin Michael Flynn. Pikëpamja e McMaster-it bie ndesh me atë të paraardhësit dhe të presidentit Trump. /tesheshi.com/
