Nga Blendi Gashi
Presidenti Hashim Thaçi, kryeministri Isa Mustafa e kryekuvendari Kadri Veseli, që nga marrja e mandatit janë përkujdesur në vazhdimësi që të stërmbushin kabinetin e tyre me këshilltarë politikë.
Këtë pozitë në shumicën e rasteve e kanë përfituar njerëz të afërt të partisë së tyre sa për t’i rehatuar për të marrë një pagë shteti, si dhe ka të tillë që nuk dihet saktësisht çfarë pune bëjnë, përjashto këtu këshilltarët për media që të paktën shihen në opinion ku përçojnë mesazhin për çështje të ndryshme të institucionit që paguhen.
Se përmes punësimit si këshilltar rehatohen të papunët, e ka treguar së fundmi dhe rasti i ish-shefit të AKI-së Bashkim Smakaj që u rehatua në Presidencë.
Është pikërisht Thaçi që ka numrin më të madh të këshilltarëve me gjithësej 12, kryeministri ka 8, ndërsa Veseli, ndonëse nuk e ka bërë publik stafin e tij, në faqen e Kuvendit, sipas raportimit të mediave, ka diku afër dhjetë këshilltarë.
Që emërimi i numrit të madh të këshilltarëve e rëndon tej mase buxhetin e shtetit, e ka dëshmuar edhe raporti që kanë publikuar fundvitin e kaluar mediat, sipas të cilit vetëm për tre muaj (prill-qershor 2016) këshilltarët e Veselit, shpenzuan nga buxheti i shtetit 168 mijë euro, ku gati çereku i këtyre parave është shpenzuar për mëditje, bileta avioni e akomodim në hotele jashtë vendit.
Opozitarët dhe analistët thonë se e quajnë të pakuptimtë numrin kaq të lartë të këshilltarëve të angazhuar, duke thënë se kjo çështje duhet të bëhet me ligj në mënyrë që të mos derdhen kot para të shtetit.
“Të ndalet luksi…”
Lahi Brahimaj, AAK
Deputeti i AAK-së, Lahi Brahimaj, thotë se Kosova si shtet i sapokrijuar duhet të ndalë luksin shtetëror, të mos gjuajë para kot duke paguar numër të madh këshilltarësh dhe kjo çështje duhet të rregullohet sa më parë me ligj.
“Kemi një qeveri ekstremisht të madhe, po ashtu një kabinet të presidentit sa kabineti qeveritar e po aq gati është edhe kabineti i kryetarit të Kuvendit. Mos të flasim që kjo qeveri menaxhon edhe me agjencione që janë në numër sa kabineti qeveritar, me paga marramendëse. Pra të gjitha këto i kushtojnë Kosovës rreth 30 milion euro në çdo mandat. A duhet vazhduar kështu? Jo, absolutisht Jo! Kjo duhet të rregullohet sa ma parë me ligj. Duhet të bëhet ligji i qeverisë, i Kuvendit e i Presidentit. Aty duhet të sanksionohet çdo gjë, duke filluar për anëtarë kabineti, këshilltarë e staf përcjellës. Pra mjaft e zhvaten këtë shtet si pa të keq”, thotë Brahimaj, për tesheshi.com.
Fazli Hoxha, NISMA
Fazli Hoxha, nga NISMA për Kosovën konsideron se numri aq i lartë i këshilltarëve politikë është i panevojshëm, sepse përbën shpenzim të jashtëzakonshëm qeveritar.
Sipas tij, kjo gjë ndodh për të kënaqur interesat personale të militantëve politikë, e jo për diç tjetër.
Hoxha tregon se nëse NISMA vjen në pushtet do propozojë që jo vetëm numri i këshilltarëve, por edhe i ministrive të zvogëlohet.
“Në qeverinë e ardhshme nëse drejtohet nga koalicioni AAK-NISMA, unë do të propozoj që numri i këshilltarëve politikë të zvogëlohet në kabinetin qeveritar, por gjithashtu mendoj se është e nevojshme edhe zvogëlimi i ministrive. Kjo do të ndikonte në masë të madhe në kursimin e mjeteve, gjegjësisht në orientimin e atyre mjeteve në investime kapitale gjë që do të ndikonte në uljen e papunësisë”, thotë Hoxha, për tesheshi.com.
“Jo më shumë se 6 këshilltarë”
Faik Krasniqi
Faik Krasniqi, njohës i rrethanave politike shprehet se as liderët e shteteve më të fuqishme të botës, nuk kanë aq shumë këshilltarë sa krerët e shtetit tonë. Madje, sipas tij, shumë edhe prej ministrave tanë kanë më shumë këshilltarë sesa ju lejohet me ligj.
Krasniqi, pohon se këshilltarët në shumicën e rasteve jo që kryejnë ndonjë punë, por është çështje e rehatimit të anëtarëve të partisë, për t’ua dhënë nga një pagë.
“Do të duhej të rregullohet me ligj që edhe të lartpërmendurit, mos të kenë të drejtë të kenë më shumë se 6 këshilltarë, sepse numri kaq i madh i këshilltarëve vetëm sa e dëmton buxhetin e Kosovës”, thotë Krasniqi, për tesheshi.com.
Shefqet Dibrani
Shefqet Dibrani, analist politik, shprehet se për vendet e zhvilluara, çështja e numrit të këshilltarëve në kabinetet qeverisës është e rregulluar me ligj, i cili respektohet nga secili zyrtar politik.
Sipas tij, në Kosovë kjo gjendje ndryshon për të keq, pasi secili zyrtar ministror ka numër enorm të këshilltarëve dhe bëjnë shpenzime marramendëse.
“Prandaj nuk është larg mendsh, se një psesë e këtyre këshilltarëve marrin vetëm paga. Madje ka të tillë që luajnë rolin e sekserëve (ndërmjetësuesve), për pazare ekonomike e veprime aspak të hijshme. Pasi vendi ynë nuk ka shënuar zhvillim dhe përparim, ku nuk kemi as sistem arsimor të duhur, as kulturë, prandaj pyetjet se a u duhen gjithë këta këshilltar mbetet gjithmonë një enigmë e pasqaruar. Por një gjë jemi të sigurt se sa të dobët të janë zyrtarët, këshilltaret e tyre ua kalojnë për nivelin e ulët të dijeve dhe emancipimit, prandaj kemi këtë gjendje sa komike po aq tragjike, e cila as nuk e ka shpresë se ka për tu përmirësuar”, thotë Dibrani, për tesheshi.com.
Këshilltarët e Thaçit:
Bekim Çollaku – shef i stafit
Abelard Tahiri – zv. shef i stafit dhe këshilltar politik
Bashkim Smakaj
Ismail Syla
Astrit Salihu
Bislim Zyrapi
Ardian Arifaj
Adil Behramaj
Artan Behrami
Astrit Zatriqi
Astrit Ibrahimi
Branislav Nikoliq
Këshilltarët e Mustafës:
Vlora Dumoshi – shefe e stafit / këshilltare politike
Sokol Havolli – shef i kabinetit / këshilltar politik për ekonomi
Valentin Toçi – këshilltar politik për ekonomi
Behxhet Musliu – këshilltar politik
Mybera Mustafa – këshilltare politike për çështje të shëndetësisë
Kastriot Halili – këshilltar politik për integrime evropiane
Faton Abdullahu – këshilltar politik për media
Besnik Berisha – këshilltar i jashtëm për çështje të drejtësisë/CDF
Këshilltarët e Veselit:
Blerim Latifi
Gëzim Kasapolli
Edon Miftari
Andri Nurellari
Avni Bytyqi
Valon Xhaferi
Driton Lajçi
Shpresim Shala
Bashkim Rrahmani
Lekë Musa – këshilltar i jashtëm./tesheshi.com/
