Dita-ditës vetëm po shtohet numri i anëtarëve në Këshillin Opozitar të inicuar nga Lëvizja Besa.
Së fundi, këtij këshilli i është bashkangjitur edhe ish-kryetari i komunës së Haraçinës, Bastri Bajrami. Ai në një njoftim për media ka theksuar se me kyçjen e tij në Këshill do të kërkon ndryshimin e mënyrës së politikbërjes në Maqedoni.
“Duke u nisur nga situata e përgjithshme politike në të cilën ndodhen shqiptarët në Maqedoni, nevoja për të bërë ndryshime rrënjësore në drejtim të përfaqësimit dinjitoz, si dhe duke dashur të ndryshohet mënyra e politikbërjes duke i rikthyer vlerat tona njerëzore dhe kombëtare – nga sot e mbështes Këshillin Opozitar. Duhet ti themi stop politikave shkatërruese ndaj shqiptarëve, prandaj vlerësoj se ka ardhur koha që të gjithë ne, të cilët nuk jemi pjesë e ndonjë partie politike, por kemi kontribuar në forma të ndryshme në jetën politike të vihemi në shërbim të popullit dhe në forma masovike të grumbullohemi kundër të keqes që na ka kapluar”, thuhet në njoftimin e Bastri Bajramit, duke shtuar se vetëm duke u bërë opozitë e kësaj të keqe, mund ti dalim zot popullit tonë.
Njëherësh, Bajrami inkurajon edhe të gjithë intelektualët, profesorët, studentët edhe ish politikanët, të bashkëngjiten në këtë Këshill Opozitar dhe njëherë e përgjithmonë t’i dëshmojnë popullit shqiptar se mundemi dhe dimë se si të mbrojmë me dinjitet shqiptarët. /tesheshi.com/
