Çështja e ngulimeve të paligjshme izraelite në Palestinë trajtohet sot në Këshillin e Sigurimit të OKB-së, ku do të votohet një projektrezolutë që i kërkon Izraelit t’i ndërpresë menjëherë dhe plotësisht të gjitha aktivitetet e ngulimeve në territorin e pushtuar palestinez.
OKB-ja i ka parë ngulimet izraelite si të paligjshme dhe në mënyrë të përsëritur i ka kërkuar Izraelit t’u japë fund atyre, por, në të kundërt, zyrtarë të këtij organizmi kanë raportuar për një lulëzim të ndërtimeve gjatë muajve të fundit.
Ngulimet izraelite janë të paligjshme sipas ligjit ndërkombëtar. Në projektrezolutën që do të votohet këtë të enjte thuhet se ndërtimi i ngulimeve nga Izraeli nuk ka vlefshmëri ligjore dhe përbën një shkelje flagrante të ligjit ndërkombëtar.
Që të miratohet, rezoluta kërkon nëntë vota në favor, e të mos ketë veto nga SHBA-ja, Franca, Rusia, Britania ose Kina.
Kryeministri izraelit i kërkoi SHBA-së që të vërë veton mbi rezolutën.
“SHBA-ja duhet të vërë veton të enjten ndaj rezolutës antiizraelite në Këshillin e Sigurimit të OKB-së,” thuhej në një reagim të Netanyahu-t në Twitter në orët e para të ditës së sotme.
Për një rezolutë të ngjashme është vënë vetoja nga SHBA-ja pesë vite më parë. /tesheshi.com/
