Pasi u arrit të që vendi të shkonte drejt zgjedhjeve të parakohshme, tashmë Maqedonia po përballet me një tjetër krizë politike, atë të mospranimit të mundshëm të zgjedhjeve nga një palë politike. Kjo, për shkak të dyshimit se këto zgjedhje nuk do të jenë brenda standarteve të kërkuara. Ndaj, Këshilli Opozitar në Maqedoni, në krye të së cilës qëndron BESA e që është grupimi më i fortë dhe më pretendues i shqiptarëve të Maqedonisë për të sfiduar dyshen e dëritanishme BDI-PDSH, paralajmërin bojkot, duke renditur disa arsye se pse mund të shkohet deri tek ky vendim. Me anë të një deklarate, është sqaruar opinionin se përse pra Këshilli Opozitar u druhet zgjedhjeve të prillit:
“Nëse për zgjedhjet e ardhshme parlamentare nuk sigurohen kushte që ato të jenë të lira dhe që votuesit t’i zgjedhin përfaqësuesit e vet e jo partia t’i zgjedhë votuesit;
Nëse edhe zgjedhjet e ardhme do jenë si të gjitha të deritanishmet, në të cilat të vdekurit votonin për politikanët kriminelë, që e përcaktonin fatin e neve të gjallëve dhe që e zhytën shtetin në këtë krizë politike;
Nëse edhe zgjedhjet e ardhme do jenë në regji të plotë të VMRO-DPMNE-së dhe dy degëve të saj partiake shqiptare, BDI-së dhe PDSH-së, dhe, së fundmi:
Nëse zgjedhjet e ardhme parlamentare do jenë në funksion të rehabilitimit të politikanëve hajdutë e kriminelë, që e barazuan shtetin me partinë dhe interesat e popullit me ato të liderëve të partive në pushtet, pra nëse edhe zgjedhjet e ardhme do shërbejnë vetëm si lavatriçe për t’i shpërlarë mëkatet e banditëve dhe kriminelëve të regjimit VMRO-BDI, atëherë Këshilli Opozitar do u bëjë thirrje shqiptarëve që ata të mos marrin pjesë në zgjedhje që nuk ofrojnë zgjidhje, por që do t’ia shtojnë jetën një Maqedonie, në të cilën një herë në vit ata përjetojnë nga ndonjë ‘Sopot’, ‘Brodec’, ‘Monstër’, likuidim, si ai i Harun Aliut me shokët, raste si ai i Natës së Tradhtisë së Madhe në Kumanovë ose që përballen me deshqiptarizimin e Maqedoninë nëpërmjet projekteve që i financojnë edhe taksapaguesit shqiptarë, siç është projekti ‘Shkupi 2014’”, thuhet kështu pra në deklaratën e Këshillit Opozitar.
