Këshilli Opozitar i inicuar nga Lëvizja Besa në Maqedoni, nën udhëheqje të analistit dhe opinionistit të njohur Kim Mehmeti, në mbledhjen e së premtes kanë shpallur nismën për organizimin e një proteste gjithëpopullore shqiptare.
Sipas tyre, protesta do të mbahet më 9 maj (në ditën e përvjetorit të Kumanovës, por edhe në Ditën e Europës), dhe ajo do ta ketë për synim ta sensibilizojë opinionin shqiptar, por edhe gjithë opinionin tjetër vendor dhe ndërkombëtar, për padrejtësinë që u është bërë në vazhdim shqiptarëve, si dhe për të shprehur kundërshtimin ndaj të gjitha proceseve të montuara që janë realizuar gjatë gjithë kësaj kohe ndaj shqiptarëve në këtë vend.
Protesta do të jetë pa emblemë partiake dhe vetëm me flamur kombëtar shqiptar.
Me këtë rast, Këshilli Opozitar i fton gjitha subjektet politike opozitare shqiptare, organizatat joqeveritare, studentët dhe rininë shqiptare, familjet e të prekurve nga këto procese të montuara, personalitetet e jetës publike, por edhe gjithë popullin shqiptar në Maqedoni, që t’i bashkohen kësaj thirrjeje. /tesheshi.com/
