Këshilli Mbipartiak në Maqedoni, një grupim opozitar që ka në ballë lëvizjen BESA, i është gëzuar faktit që kauzës së saj i është bashkuar dhe një tjetër personalitet, profesori i njohur Hasan Jashari.
Ky këshill, ka ofruar për publikun një status të prof. Jasharit në FB, ku ai shpjegon shkurt e qartë se përse ka vendosur të mbështesë Këshillim Mbipartiak:
“Të nderuar miq,
Vendosa të përkrah Këshillin mbipartiak me qëllim të krijimit të një sociokulture të qëndrueshme , për një filozofi politike të re. Situata në të cilën jemi , si shqiptarë në Maqedoni , na ka bërë instrument i proceseve të montuara; të vrasjeve, burgosjeve , shantazheve… Në elitën politike aktuale ka korupcion dhe amaterizëm politik ; vota e popullit shpërdorohet në projekte si Shkupi 2014, Muzeume e godina partiake, politikë qeveritare proruse etj. Ne të gjithë po bëhemi viktimë e Vmrovizimit të Maqedonisë perëndimore. Shkollat janë pa rrymë elektrike dhe studentët pa nxemje nga Struga deri në Shkup.
Të dashur miq,
Të ardhmen më të mirë për gjeneratat e ardhshme mund ta bëjmë së bashku nëse i përkrahim forcat e reja politike, ata të cilët do ta marrin votën tonë dhe do ta materializojnë atë në dobi të mirëqenjes qytetare dhe kombëtare. Nuk mund të bëjmë asgjë poqese rrijmë anësh dhe shkruajmë kolumna, flasim nëpër cajtore dhe kritikojmë, e përsëri , nga presionet ose gjëra të ngjashme, e japim votën si më parë, me arsyetim se ne nuk mund të bëjmë kurgjë.
Përkundrazi , pikërsiht këtu është faji ynë dhe prej qëndrimit tonë dhe raportit që vendosim ndaj të keqes dhe të mires, varen gjërat. Kycja në forcat opozitare më është përgjegjësi qytetare e secilit. Është zëri i brendshëm i arsyes dhe Unit tonë.”
Këshilli Mbipartiak, po mbledh rreth vetes figura të njohura dhe të pakompromentuara të shoqërisë shqiptare në Maqedoni në parapërgatitje për sprovën e parë elektorale përballë VMRO – BDI-së në zgjedhjet e pritshme të prillit. /tesheshi.com/
