Rezoluta kundër terrorizmit është votuar njëzëri në Këshillin e Sigurimit të OKB-së, duke e çuar në një nivel global luftën ndaj ISIS-it.
Nëpërmjet kësaj rezolute të adoptuar, Kombet e Bashkuara u kërkojnë shteteve të luftojnë një kërcënim të paprecedent dhe global ndaj paqes dhe sigurisë ndërkombëtare.
Rezoluta u kërkon të gjitha shteteve anëtare që kanë kapacitetet për të vepruar kështu t’i marrin të gjitha masat e nevojshme në territorin nën kontrollin e ISIS-it.
Kjo rezolutë, e propozuar nga Franca pas sulmeve të së premtes së shkuar në Paris, i bën thirrje bashkësisë ndërkombëtare të mobilizohet dhe të organizohet për të luftuar kërcënimin global që paraqet terrorizmi.
Ambasadori francez në OKB, François Delattre, e ka quajtur historike rezolutën. Ajo e kornizon aksionin tonë nën ligjin ndërkombëtar, është shprehur ambasadori, dhe jep një garanci se do të ketë një luftë efektive kundër terrorizmit ndërkombëtar. /tesheshi.com/
