Pas orësh të tëra negociatash, Këshilli i Sigurimit ka miratuar njëzëri këtë të premte një rezolutë e cila mbështet një proces paqeje që synon t’i japë fund konfliktit të përgjakshëm sirian.
Të 15 vendet anëtare të Këshillit të Sigurimit u pajtuan për tekstin e rezolutës, ku parashihet një armëpushim në tërë Sirinë, shoqëruar më pas me një qeveri tranzicioni.
Në rezolutë thuhet mes të tjerash se, “E vetmja zgjidhje e qëndrueshme për krizën e tanishme në Siri është nëpërmjet një procesi politik përfshirës dhe të udhëhequr nga sirianët, që përmbush aspiratat legjitime të popullit sirian.”
Përmes rezolutës bëhet thirrje për bisedime paqeje e për armëpushim që nga janari i vitit të ardhshëm.
Sekretari amerikan i Shtetit, John Kerry, e ka cilësuar rezolutën si “një mesazh të qartë për të gjithë të interesuarit se tani është koha për t’i ndalur vrasjet në Siri”.
Më tutje ai ka sqaruar se rezoluta synon vendosjen e një qeveria tranzicioni brenda gjashtë muajve, duke hapur rrugën për zgjedhje të përgjithshme në 18 muajt e ardhshëm.
Megjithatë, rezoluta e shmang dhe nuk e përmend çështjen delikate të Beshar Esadit, se çfarë do të bëhet me të? Po ashtu rezoluta nuk i jep përgjigje pyetjes se cilat grupe opozitare do të përfshihen në bisedimet e paqes. Rreth të dyja çështjeve ka debat dhe mospajtim mes aktorëve të përfshirë në kërkimin e zgjidhjes së konfliktit. /tesheshi.com/
