Mes Teheranit dhe Riadit ka patur ditët e fundit një shkëmbim të nxehtë deklaratash në lidhje me haxhin e me sigurinë e pelegrinëve.
Këshilli i Bashkëpunimit të Gjirit ka reaguar, duke e dënuar deklaratën e liderit suprem të Iranit, Ali Hameneit.
Sekretari i përgjithshëm i Këshillit të Bashkëpunimit të Gjirit, Abdullatif bin Rashid ez-Zejani, ka thënë se deklarata e liderit suprem të Iranit synonte të krijonte provokim gjatë haxhit, e se ishte një përpjekje e dëshpëruar për ta politizuar ritualin e madh islam.
“Bota muslimane është plotësisht e vetëdijshme për përpjekjet e palodhura të Arabisë Saudite, të udhëheqjes, të qeverisë dhe të popullit të saj për ta organizuar e për ta lehtësuar haxhin, dhe për të garantuar siguri për pelegrinët,” është shprehur ai.
Vendet e Bashkëpunimit të Gjirit, ka bërë të ditur ez-Zejani, e quajnë të padrejtë fushatën mediatike, duke i hedhur poshtë deklaratat e njëpasnjëshme të zyrtarëve të lartë iranianë kundër Arabisë Saudite.
“Këto akuza janë të papajtueshme me vlerat dhe parimet e fesë së shenjtë të Islamit, që bën thirrje për dhembshuri, dashuri e vëllazëri. Fushata të tilla nuk ndihmojnë në ndërtimin e një marrëdhënie konstruktive midis vendeve islame,” do të shtonte sekretari i përgjithshëm i Këshillit të Bashkëpunimit të Gjirit. /tesheshi.com/
