Në takimin në Riad të ministrave të Jashtëm të Këshillit të Bashkëpunimit të Gjirit, ku qe i pranishëm dhe kryediplomati turk, Mevlyt Çavushogllu, i është bërë thirrje Iranit që t’u japë fund ndërhyrjeve sektare në rajon.
Pas takimit ministerial, në një konferencë të përbashkët shtypi të ministrit të Jashtëm turk dhe të homologut të tij saudit, Adil el-Xhubejri, ky i fundit ka kërkuar nga “Irani dhe Iraku që të mos nxisin sektarizmin në rajon”.
Irani i mbështet husinjtë në konfliktin jemenas, siç mbështet regjimin sirian në konfliktin e përgjakshëm në Siri. Iraku po ashtu e ka ashpërsuar shumë gjuhën ndaj Turqisë së fundi, që shpesh ka marrë dhe nota kërcënuese.
Në një deklaratë të përbashkët pas takimit në Riad janë dënuar sulmet mbi Halep, si dhe është shprehur keqardhja e thellë për paaftësinë e OKB-së dhe të bashkësisë ndërkombëtare për t’i ndalur këto sulme.
Po ashtu është nënvizuar kundërshtia e plotë për përdorimin e territorit irakian si një strehë e sigurtë për grupet terroriste për të kryer sulme terroriste dhe për të kontrabanduar armë e lëndë shpërthyese. /tesheshi.com/
