Ndodh hera herës që në konferencat e Ramës për media, të ngrihet ndonjë gazetar i ri e kurajshëm E t’i bëjë një pyetje të vështirë kryeministrit, qartazi duke e vënë në siklet, aq sa për t’u bërë viral më pas prej vlerësimit të gjindjes për të. Por çuditërisht nuk ndodh kjo me Berishën apo të konferencat e Berishës.
Te ky i fundit, në raport me broçkullat e panumërta që lëshon, të një niveli të frikshëm të fyerjes së inteligjencës dhe më minimale njerëzore, nuk shfaqet as një punëtor mediatik, nga ata që rreshtohen në tavolinën katërkëndore për t’ia dëgjuar e regjistruar deklarimet, i cili në respekt dhe të inteligjencës së vet, të ngrihet e ta pyesë sfidueshëm për shumëçka prej mufkave të trasha që nxjerr çdo ditë nga goja. E ndjekin kokëulur, të heshtur, a thua së janë ushtarë të tij, për të raportuar më pas, pa asnjë përpunim apo selektivitet, gjithëçfarë thotë, si akuza e si komente të rëndomta politike.
Ja fjala vjen, edhe si një lloj ndihmese për këta gazetarë të vetëtredhur, të cilët te Rama shfaqen si ujqër e te Berisha shndërrohen në lepuj, ta pyesin të shndërruarin e sakaqshëm në trampist se ç’mendon ai për projektin e pastrimit të Gazës nga palestinezët autoktonë. Ka dhe të tjera të ngjashme, por le të mjaftohen me kaq. Ndryshe, mos fyejnë veten dhe profesionin që bëjnë duke u bërë thjesht punëtorë transporti e vetëzhbërë si gazetarë, të idiotësive të një aktori politik thellësisht të patalent, pa asnjë shfaqje për t’u duartrokitur në karrierë. /tesheshi.com/
