Një kontigjent i ri prej 246 efektivësh të rinj policore i janë shtuar së fundi trupës së Policisë së Shtetit.
Në ceremoninë e diplomimit, ministri i Brendshëm Bledi Çuçi u përcolli atyre këshilla që të mos joshen nga korrupsioni dhe krimi, pasi herët e vonë do ndëshkohen nga drejtësia dhe se kur t’a kuptojnë gabimin do jetë shumë vonë për t’u kthyer pas.
“Dua t’iu jap ca porosi këshilla, jo vetëm si ministër që mendoj që duhet t’i keni parasysh gjatë rrugëtimit: mos u joshni nga korrupsioni dhe nga krimi, se jo vetëm që do përballeni me forcën e ligjit dhe ndëshkimin e ligjit, por edhe se korrupsioni dhe krimi do iu zhveshin nga dinjiteti. Kur ta kuptoni këtë gjë do jetë shumë vonë për ta korrigjuar gabimin”, u tha atyre eprori politik.
Gjithashtu, Çuçi i nxiti që mos i tuten krimit.
“Mos u thyeni nga krimi, jeni të guximshëm, jo vetëm nga krimi por edhe nga politika që për fat të keq ende dhe ajo politikë e mbrapshtë vazhdon atë rrugën e përbaltjes që e ka ringjallur dhe po e ringjallin fantazmat e politikës së vjetër. Mos u thyeni nga këto sulme, shikoni drejt së ardhmes, drejt zbatimi të ligjit”, ishin këshillat e ministrit të Rendit. /tesheshi.com/
