Komisioneri evropian për Drejtësi, Vera Jourova, tha në Shkup se Komisioni Evropian nuk kishte asnjë dyshim për perspektivën evropiane të Ballkanit Perëndimor, por shtoi se sundimi i ligjit ishte në thelb të procesit të pranimit në BE.
Në një konferencë për shtyp pas ditës së parë të Forumit Ministror BE-Ballkan Perëndimor për Drejtësinë dhe Çështjet e Brendshme, ajo tha se rajoni do të mbetet një përparësi, duke përsëritur se reformat gjithëpërfshirëse dhe të qëndrueshme ishin ende të nevojshme në fushat kryesore dhe se përparimi në procesin e zgjerimit ishte mbi të gjitha në duart e vendeve të Ballkanit Perëndimor.
“Komisioni Evropian është plotësisht i bindur se Shqipëria dhe Maqedonia Veriore kanë bërë përparim të mjaftueshëm për të justifikuar hapjen e negociatave për anëtarësim, por ekziston një hapësirë e konsiderueshme në të cilën sundimi i ligjit në të gjitha vendet e Ballkanit Perëndimor mund të përmirësohet”, tha Jourova.
Jourova theksoi se Komisioni Evropian është i gatshëm të vazhdojë mbështetjen e partnerëve në Ballkanin Perëndimor përmes ndihmës financiare, teknike dhe ekspertëve. /tesheshi.com/
