Kreu i mulslimanëve në Kosovë, njeriu që drejton BIK-un, Myftiu NaimTërnava, i ka përcjellë një urim për Krishtlindje (Kërshëndella në variantin kosovar), njeriut që është në krye të katolikëve në Kosovë, Dom Lush Gjergji.
Aty, Tërnava shpreh “vëllazërinë” me të krishterët kur thotë se “me rastin e festës së Kërshëndellave, kam nderin e veçantë t’ju drejtohem me këtë mesazh urimi e përgëzimi Juve, meshtarëve tuaj, si dhe të gjithë vëllezërve të krishterë duke ju dëshiruar shëndet, mbarësi e lumturi.
Kërshëndella është moment i veçantë që simbolizon e përkujton lindjen, jetën e mbarësinë. Po ashtu kjo festë përçon në mënyrën më të mirë mesazhin për ndërtimin e shoqërisë së shëndoshë e humane”.
Në urim, figura më e lartë zyrtare e jetës islame në Kosovë, i mëshon fort bashkëjetesës fetare, duke veçuar dhe të gjita ata të krishterë të huaj, të cilët ndodhen në Kosovë për arsye të ndryshme.
“Zotni Ipeshkëv, festat fetare te ne gjithherë kanë qenë momente që na kanë bashkuar në të mirë, nga to kemi mësuar e kultivuar tolerancën, harmoninë, ndërgjegjësimin për paqen, respektin dhe dashurinë për tjetrin.
Zotni Ipeshkëv, nëpërmjet jush, uroj e përgëzoj edhe të gjithë praninë ndërkombëtare katolike në Kosovë. Duke ju përshëndetur, Ju dëshiroj shëndet, mbarësi e lumturi”, shkruan kreu i Bashkësisë Islame të Kosovës. /tesheshi.com/
